बिरामीको अपरेशन गर्ने बेला डाक्टरको मृत्यु !

प्रकाशित मिति : ९ मंसिर २०७७, मंगलबार  १२ : ००


बिरामीको शल्यक्रिया (अपरेशन) गर्ने भनेर अपरेशन थिएटरमा छिरेका डाक्टरकै मृत्यु भएपछि अवस्था कस्तो होला ? सामान्य रुपमा यो कल्पनाभन्दा बाहिरको कुरा हो ।

तर, कहिलेकाँहि भने यस्ता घटना भइदिन्छन् । साउदी अरबको एउटा सरकारी अस्पतालमा बिरामीको शल्यक्रिया गर्न लागेका एक चिकित्सकको मृत्यु भएको छ ।

साउदी सञ्चारमाध्यमका अनुसार हाडजोर्नीसम्बन्धी शल्यक्रिया गर्न गएका बेला ती चिकित्सक आफैँ अस्वस्थ भएका थिए ।

अल वतन दैनिक वेवसाइटले खामिस मुशैट सिभिल हस्पिटलमा डा. महदी अल इमारीलाई हृदयाघात पछि मृत्यु भएको जनाएको छ ।

शल्यकक्षमा असहज भएको देखेपछि सहकर्मीहरूले ती चिकित्सकको मुटु जाँच्न लगाएका थिए।

अस्पतालका अर्थोपेडिक विभागका प्रमुख डा. मजिद अल शहरीलाई उद्धृत गर्दै अल वतनले लेखेको छ, ‘एक बिरामीको शल्यक्रिया गर्न उपस्थित भएका इमरीलाई हामीले थकित भएको र पेटको पीडाले सताएको सङ्केत देख्यौँ।’

इमरीले सुरुमा आफ्नो परीक्षण गर्न अस्वीकार गरेको र बिरामीको शल्यक्रिया गर्ने कुरामा जोड दिएको कुरा विभाग प्रमुख शहरीले बताएका छन् ।

अन्तत: उनलाई इलेक्ट्रोकार्डियोग्राम गर्न मनाइयो । त्यसमा उनलाई हृदयाघात भएको देखिएको अस्पतालले जनाएको छ ।

‘आफ्नो कर्तव्य निर्वाहका क्रममा उनको मृत्यु भयो,’ गल्फ न्यूज वेवसाइटका अनुसार डा. शहरीले भनेका छन् ।

इलेक्ट्रोकार्डियोग्राम गरिएपछि उनले बिरामीको अपरेशन गरे कि गरेनन् भन्ने स्पष्ट भएको छैन ।


प्रतिक्रिया दिनुहोस्