एकपटक कोरोना भएको व्यक्तिलाई के फेरि संक्रमण हुन्छ? यस्तो छ अध्ययन

प्रकाशित मिति : मंसिर १७, २०७७ बुधबार


काठमाडौं । चीनको वुहानबाट फैलिएको कोरोना भाइरस (कोभिडि-१९) अहिले विश्वभर फैलिएको छ।

कोरोना संक्रमण भएर केहीको ज्यान गइसकेको छ भने धेरैले यस भाइरसलाई परास्त गरिसकेका छन्। कतिपय यस भाइरस विरुद्ध जुधिरहेका छन्।

कोरोना संक्रमित भइरहँदा धेरैको मनमा आउने एउटा प्रश्न हो, एकपटक कोरोना संक्रमित भएपछि के दोस्रो पटक पनि संक्रमित भइन्छ?

हालैको एउटा अध्ययनका अनुसार कोरोनाभाइरस विरुद्ध निर्मित एन्टिबडी मानिसको शरीरमा कम्तीमा छ महिना बस्ने र त्यसले दोस्रो पटक सङ्क्रमण हुनबाट जोगाउने प्रमाण भेटिएको छ।

बीबीसीका अनुसार अक्स्फर्ड यूनिभर्सिटीद्वारा सञ्चालित अस्पतालहरूमा कार्यरत स्वास्थ्यकर्मीको नियमित कोभिड-१९ परीक्षण र पहिला सङ्क्रमण भएको थियो कि थिएन भनेर हेर्न एन्टिबडी परीक्षण गरिएको थियो।

शरीरमा जति धेरै मात्रामा एन्टिबडी हुन्छ पुनः सङ्क्रमण हुने सम्भावना पनि उति नै कम हुन्छ।

अर्को छुट्टै अध्ययनमा अरू कोरोनाभाइरसका कारण विकसित प्रतिरक्षा क्षमताले पनि कोभिड-१९ हुन नदिएको देखियो।

सङ्क्रमणविज्ञ डा. केटी जेफ्रीले कोभिड खोप बन्न लागेको अवस्थामा अक्स्फर्ड यूनिभर्सिटीको निष्कर्षलाई ‘उत्साहवर्धक समाचार’ भनेकी छन्।

उनका अनुसार एक चोटि भाइरसको सङ्क्रमण भएपछि फेरि कोभिड हुन नदिन ‘छोटो अवधिकै लागि भए पनि सुरक्षा प्राप्त’ हुने अनुसन्धाताहरूले बताएका छन्।

अक्स्फर्ड यूनिभर्सिटीको अध्ययनमा स्वास्थ्यसेवाका १२,००० कर्मचारीलाई संलग्न गराइएको थियो। तीमध्ये ११,००० जनामा कोभिड-१९ को एन्टिबडी भेटिएको थिएन।

भाइरल सङ्क्रमण हुँदा शरीरले एन्टिबडी निर्माण गर्छ। ती तत्त्वहरूले भाइरसलाई अन्य कोषभित्र छिर्न दिँदैनन्।

अध्ययन आरम्भ गरिँदा एन्टिबडी नभएकामध्ये ८९ जनामा लक्षणसहितको सङ्क्रमण भयो। स्वाब परीक्षणबाट सङ्क्रमण पुष्टि गरिएको थियो।

तर कोरोनाभाइरसविरुद्ध एन्टिबडी भएका कुनै व्यक्तिमा पनि अध्ययन अवधिभरि लक्षण देखिनेगरी सङ्क्रमण भएन।

परीक्षण गर्दा एन्टिबडी बनेको पुष्टि भए पनि तीन जनामा भने लक्षणविहीन कोभिड-१९ भएको पाइयो। उक्त समूहमा ७६ जनामा एन्टिबडी थिएन।बीबीसी


प्रतिक्रिया दिनुहोस्