धान खेत फाँडेर पीडितको पक्षमा भाषण, कम्युनिस्ट सरकारको चर्को आलोचना

प्रकाशित मिति : ८ भाद्र २०७७, सोमबार  १ : २१


काठमाडौं । गृहमन्त्री रामबहादुर थापा ‘बादल’, उद्योग वाणिज्य तथा आपूर्तिमन्त्री लेखराज भट्ट, पूर्वउपप्रधान एवं रक्षामन्त्री भीम रावललगायत नेकपाका नेता धान खेतमा बनाइएको मञ्चमा भाषण गरिरहेको एउटा तस्वीर अहिले सामाजिक सञ्जालमा भाइरल बनेको छ ।

विशेषत गृहमन्त्री रामबहादुर थापाले भाषण गरिरहेको तस्वीरमा धेरैले प्रतिक्रिया जनाएका छन् ।

बाढीले धानखेत बगाएर पीडित बनेका कृषकलाई सरकारी टोलीले थप पीडा दिएको भन्दै नेता तथा मन्त्रीहरुको आलोचना भएको हो ।

कम्युनिष्ट सरकार श्रमजिवी, श्रमिक र सर्वहाराको हुनुपर्नेमा श्रमजिवीको खेतमा पाक्न लागेको धान नै सखाप पारेर मञ्च बनाएर भाषण नगरि नुहने किन रहेछ भन्दै सामाजिक सञ्जालमा चर्चा चलेको हो ।

कतिपय सामाजिक सञ्जाल प्रयोगकर्ताले चिनियाँ राष्ट्रपति सि जिनपिङ ले कृषकका खेतबारीमा पुगेर अवलोकन गरेको, हिलो खेतमा गएको र भाषण नगरि फर्किएको भन्दै नेकपाका नेताले चिनियाँ कम्युनिस्ट पार्टीबाट किन केही पनि सिक्न नसकेको होला भन्दै आलोचना गरेका छन३ ।

नेकपाका कार्यकर्ताहरुले भने धान नभएको स्थानमा कार्यक्रमको आयोजना गरिएको भन्दै बचाउन गर्न खोजेका छन् तर सामाजिक सञ्जाल फेसबुक ट्वीटरमा गृहमन्त्री थापासहित अन्य नेताको चर्को आलोचना भइरहेको छ ।

कहाँको हो घटना ?

अछामको रामारोशन गाउँपालिकामा आएको बाढी र त्यसले पु¥याएको मानवीय र भौतिक क्षतिपछि प्रभावित क्षेत्रमा पुगेका गृहमन्त्री रामबहादुर थापा बादलले स्थानीयलाई सम्बोधन गर्न धानबारी माडेर कार्यक्रम गरेको पाइएको छ।

बाढी आएको पर्सिपल्ट भदौ ५ गते गृहमन्त्री रामबहादुर थापा, उद्योग बाणिज्य तथा आपूर्तिमन्त्री लेखराज भट्ट, पूर्व उपप्रधानमन्त्री भीम रावल सहितको टोली हेलिकोप्टरमा प्रभावित क्षेत्रमा पुगेका थिए।

स्थानीय कैलाश खोलामा आएको बाढीले रामारोशन गाउँपालिका ५ सैनीबजारमा १७ जना बेपत्ता भएका थिए। २५ घर तथा पसल बगेको थियो। बाढी भदौ ३ गते आएको थियो। लहलहाइरहेको धान माडेर गृहमन्त्रीसहितको टोली कार्यक्रममा सहभागी भएपछि सामाजिक सञ्जालमा व्यापक आलोचना भएको छ।

कतिपयले कार्यक्रम गर्न ठाउँ नपाएरै धानबाली माड्नुपरेको भन्दै गृहमन्त्रीसहितको टोलीको आलोचना गरेका छन्।


प्रतिक्रिया दिनुहोस्