‘प्रधानमन्त्री गरीब कल्याण योजना नोभेम्बरको अन्त्यसम्म चालु रहने’

प्रकाशित मिति : असार १६, २०७७ मंगलबार


सरकारले प्रधानमन्त्री गरीब कल्याण खाद्य योजनालाई नोभेम्बरको अन्त्यसम्म चालु राख्ने बताउनुभएको छ। यस योजना अन्तर्गत गरीब र आवश्यक रहेका घर परिवार, जसको रासन कार्ड रहेको छ, लाई खाद्यान्न प्रदान गर्ने व्यवस्था गरिएको छ। भारतमा रासन कार्ड लिएका करिब ८० करोड नागरिक रहेका तथ्याङ्क रहेको छ।

भारतमा जुलाईदेखि चाडपर्बको मौसम शुरू हुन्छ। त्यसैले चाडपर्बको यस मौसममा भारतीयहरूको खर्च बढ्ने हुँदा गरीब तथा आवश्यक पर्ने सबै नागरिकलाई महामारीको समयमा कुनै पनि अभावको सामना गर्नु नपरोस् भन्ने उद्देश्यका साथ विगत तीन महिनादेखि सञ्चालित उक्त योजनालाई नोभेम्बर अन्त्यसम्म सञ्चालन गर्ने र यसबाट ८० करोड जनताले निःशुल्क खाद्यान्न पाउने प्रधानमन्त्री नरेन्द्र मोदीले बताउनुभएको छ।

सरकारले यो पाँच महिना प्रति परिवार पाँच किलोग्राम गहुँ वा चामल र एक किलोग्राम चना उपलब्ध गराउने घोषणा गर्नुभयो। सरकारलाई यस योजनालाई थप गर्नका लागि करिब ९० हजार करोड थप खर्च लाग्ने बताइएको छ।

भारतीय प्रधानमन्त्री मोदीले महामारीलाई मध्यनजर गर्दै विगत तीन महिना पनि उक्त योजना लागु भएको प्रसङ्ग उल्लेख गर्दै भन्नुभयो,“ जुन ३० मा सकिने महामारीमा उद्धार प्याकेजका रूपमा जारी योजनालाई लम्ब्याउँदा १.५ लाख करोड खर्च राज्यको खर्चमा जोडिनेछ।”

भारतीय जनता पार्टी र प्रतिपक्षी भारतीय काङ्ग्रेसको सरकार भएका विभिन्न २१ राज्यले यो योजना सेप्टेम्बरसम्म लागु गर्नका लागि केन्द्र सरकारलाई आग्रह गरिसकेका छन्। यस पहिले भारतीय प्रधानमनत्री नरेन्द्र मोदीले महामारीको समस्या अझै कायम रहेको भन्दै सामाजिक दूरी कायम गर्दै दोस्रो चरणको बन्दाबन्दीको घोषणा गर्नुभएको थियो।


प्रतिक्रिया दिनुहोस्