लकडाउन मोडालिटी परिवर्तन गरि सबै क्षेत्र खोल्न व्यवसायीहरुको माग

प्रकाशित मिति : असार ५, २०७८ शनिबार


काठमाडौं । उद्योगी व्यवसायीहरुले लकडाउनको मोडालिटी परिवर्तन गरी स्वास्थ्य सुरक्षा अपनाई सबै क्षेत्रलाई खोल्नुपर्ने बताएका छन् ।

लामो समय लकडाउन हुँदा श्रमिक र उद्योगी व्यवसायी सबै समस्यामा परेकाले अब उद्योग व्यवसाय खोल्नुको विकल्प नरहेकोमा सबै क्षेत्रका उद्योगी व्यवसायीहरु एक मत देखिएका छन्।

उनीहरुले सबैभन्दा पहिला साना तथा मझौला उद्योग र पसल व्यवसायलाई सञ्चालन गर्न सकिने, यातायातका साधनहरुलाई पनि पहिलो प्राथमिकतामा राखेर खोल्नुपर्ने, होटल व्यवसायलाई क्रमश सञ्चालन गर्नुपर्ने गरी चरणवद्ध र योजनावद्ध रुपमा सबै क्षेत्रलाई खोल्नु पर्ने बताएका छन्।

उद्योगी व्यवसायीहरुले लामो समय लकडाउन भएका कारण हरेक वस्तु तथा सेवा अत्यावस्यक भइसकेकाले तत्काल खोलेर आर्थिक जनजीवनलाई सहज बनाउनुपर्नेमा जोड दिएका हुन् । उत्पादन मुलक उद्योगलाई खोल्ने तर यातायात र पसलहरुलाई नखोल्ने हो भने कुनै अर्थ नहुने भएकाले सबै क्षेत्रलाई प्राथमिकतामा राखेर न्यूनतम स्वास्थ्य सुरक्षाका विधिहरु अपनाई खोल्ने व्यवस्था गर्नुपर्ने उद्योगी व्यवसायीहरुले बताएका छन् ।

नेपाल चेम्बर अफ कमर्सका अध्यक्ष राजेशकाजी श्रेष्ठले संक्रमित बढेको र नबढेको क्षेत्रलाई छुट्याएर आर्थिक क्रियाकलापलाई सुचारु गर्नुपर्ने बताउनुभयो । उहाँले ७५÷७६ दिन लकडाउनमा सबैजना बसिसकेको कारण अव कसरी अगाडि जानुपर्छ भन्ने विषयमा सबैजना जानकार रहेको बताउनुभयो । उहाँले अवपनि अर्थतन्त्रलाई चलायमान गर्न नसके कोरोनाबाट नभई भोकमरीले ज्यान जानेको संख्या बढ्ने र अर्थतन्त्र ध्वस्त भएर जाने बताउनुभयो । उहाँले अत्यावस्यक सामान र पसलहरु सबै खोल्नु पर्ने बताउनुभएको छ।

सरकारले उद्योग खोल्न भनेपनि उद्योगले उत्पादन गरेको बस्तु विक्री गर्नको लागि बजार समेत खोल्नुपर्ने बताउनुभयो । उहाँले पसलहरु बिहान ११ बजेदेखि साँझ साढे पाँच बजे सम्म खोल्ने व्यवस्था गरेमा सडकमा सवारी साधनको चाप कम हुने बताउनुभयो।

मानिसहरुको आवागमनका लागि सवारी साधन जोर बिजोर प्रणालीबाट खोल्नुपर्ने अध्यक्ष श्रेष्ठले बताउनुभयो। उहाँले सबै उद्योग व्यवसायीको लगानी महत्वपूर्ण भएकाले सबै क्षेत्र खोल्नुपर्ने बताउनुभएको छ।

उद्योग वाणिज्य महासंघका उपाध्यक्ष चन्द्रप्रसाद ढकालले सबैभन्दा पहिला साना तथा मझौला व्यवसायहरु सञ्चालनमा आउनुपर्ने बताउनुभयो । उहाँले साना तथा मझौला किसिमका उद्योग व्यवसायमा सबैभन्दा बढी रोजगारी रहेकोले त्यस क्षेत्रलाई महत्व दिइ सञ्चालन गर्नुपर्ने बताउनुभयो । उहाँले यातायातको क्षेत्रलाई पनि पहिलो चरणमा नै सञ्चालन गर्नुपर्ने बताउनुभयो।

त्यस्तै सेवा क्षेत्रमा पनि बैंक तथा वित्तीय संस्था र बीमा कम्पनीलाई पूर्ण रुपमा चलाउने र होटल व्यवसायलाई पनि प्यारामिटर बनाएर सञ्चालन गर्नुपर्ने बताउनुभयो । त्यसपछि मात्रै समग्र अर्थतन्त्रलाई सामान्यिकरण गर्दै जानुपर्ने उहाँले बताउनुभयो ।

होटल संघ नेपालकी अध्यक्ष सृजना राणाले होटल क्षेत्रमा ब्याङ्केट बाहेकका सेवा सुचारु गर्न सकिने बताउनुभयो । उहाँले स्वास्थ्य सुरक्षाका उपायहरु अपनाएर होटल तथा रेस्टुरेन्टहरुलाई सञ्चालन गर्न सकिने बताउनुभयो । होटल तथा रेस्टरेन्टहरुलाई कसरी सेवा दिनुपर्छ भन्ने विषयमा होटल संघले गृहकार्य गरी मापदण्ड तयार पारिसकेको बताउनुभयो ।

नाडा अटो मोबाइल्स एसोसिएसनका अध्यक्ष कृष्णप्रसाद दुलालले सबै क्षेत्रमा स्वास्थ्य सुरक्षाका आधारभुत विधिहरु अपनाइ खोल्नुपर्ने बताउनुभयो । उहाँले सरकारलाई आफुहरुले कसरी सावधानी अपनाउन सकिन्छ भन्ने विषयमा १६ वटा बुँदामा लिखित सुझाव दिइसकेको बताउनुभयो । उहाँले कार्यालय जाँदा खाजा तथा खाना बोकेर जाने, अनलाइनबाट मात्रै कारोबार गर्ने, कुनै पनि वस्तु पन्जा तथा मास्क लगाएर छुने, स्यानिटाइजरको प्रयोग अधिकतम गर्ने, अफिसमा एसि नचलाउने तथा गोदाममा तीन दिन सम्म सामग्री राखेर मात्रै विक्री गर्ने व्यवस्था मिलाउने गरी सञ्चालन गर्न सकिने बताउनुभयो ।

यातायात व्यवसायी राष्ट्रिय महासंघका महासचिव सरोज सिटौलाले यातायात क्षेत्रमा कामगर्ने मजदुरलाई स्वास्थ्य सुरक्षा सम्बन्धी सामग्री उपलब्ध गराएर यातायात क्षेत्रलाई पहिलो चरणमा खोल्नुपर्ने बताउनुभयो । अर्थतन्त्रको रक्तसन्चार नै यातायात क्षेत्र भएकोले अग्रपंक्तिमा राखेर यसलाई सुचारु गर्नुपर्ने उहाँले बताउनुभो । तर सरकारले यातायात क्षेत्रमा काम गर्ने श्रमिकहरुलाई स्वास्थ्य सामग्री उपलब्ध नगराए यातायात सञ्चालन गर्न अनुमति दिए पनि आफुहरुले सञ्चालन गर्न नसक्ने महासचिव सिटौलाले बताउनुभयो ।

उहाँले यातायात क्षेत्रका श्रमिकहरु सुरक्षित नभए संक्रमण तिब्र गतिमा फैलन सक्ने भएकाले सरकारले ध्यान दिनुपर्ने बताउनुभयो।

यातायात व्यवसायीहरुले अन्य कुनै माग नराखेको तर श्रमिकको सुरक्षामा ध्यान नदिई यातायात सञ्चालन गर्न नसकिने बताउनुभयो ।


प्रतिक्रिया दिनुहोस्