धेरैपछि

धेरैपछि
आमासँग छु 
ममताको शितल छायाँ मुन्तिर
लहलहाएका छन् उधुमले 
जिन्दगीका सप्तरङ्गी खुशीहरु 
सिंचेर मलाई बार बार 
आशीर्वादको नदी बगिरहन्छ 
सलल सलल 
धपेडीको उष्णताले डढेको म
हराभरा हुन्छु उसैघरि 
ठिङ्ग उभिन्छ शिरानतिर 
विश्वासको अटल हिमाल
भरोसाको भव्य भुवाँदार फाँट
मेरा पाउ ढाकेर फैलिन्छ !
र, कुत्कुत्याएर मलाई 
एक बैंशालु पवन बयली खेल्छ 
वरिपरि परिवेशभरि 
धेरैपछि बुझें मैले 
आमा त एक स्वर्ग रहेछिन् !
–––––––––––––––

धेरैपछि पियारीसँग छु 
परिस्थितिका क्रूर पाइलाहरुले कुल्चेको 
मृतप्रायः यो देह 
कोतरेका अभावका पञ्जाहरुले  
अनगिन्ती जहरिला घाउहरु 
 हिर्काएका निष्ठुर समयले
हजार हजार सुम्ला र नीलडामहरु 
सब ठीक भएका छन् एकाएक
प्रेमको संजीवनी बुटीले 
फेरि एकपटक 
बौंरिएको छु म सम्पूर्ण उर्जासहित 
र, मसँगै बौरिएका छन् 
मेरा हजार सपनाहरु 
धेरैपछि बुझें आज 
उनी त 
एक भव्य उर्जा र सपना रहेछिन् 
–––––––––––

धेरैपछि प्रकृतिसँग छु 
छोएर सुस्तरी सुस्तरी 
हरपल मुस्कुराइरहने 
सुकोमल र सुवासिला फूलहरु 
म पनि मगमगाएको छु उस्तैगरी 
हेरेर पुलकित भावले 
गगनमा मस्त मस्त 
उडिरहेका प्रेमील पन्छीहरु
म पनि एक भव्य उडानमा छु 
सुसेल्दै पिरतीका सुरिला धुनहरु 
सलल सलल बगिरहेका 
निर्मल र कञ्चन खोलाहरुमा 
बगाइरहेछु म निरन्तर निरन्तर 
जिन्दगीका रोग र दुर्गन्धहरु 
धेरैपछि बुझे मैले 
प्रकृति एक मोक्ष रहेछिन् !!

२०७६ चैत्र २९