काठमाडौँ । सीमा बन्द भएपछि ३ दिनदेखि भारतीय भूमि धार्चुलापारी ४५० बढी नेपाली अलपत्र परेका छन्। अलपत्र नेपालीले नेपाल प्रवेशको माग गर्दै नाराबाजी गरिरहेका छन्।
भारतको मिथौरागढलगायतका क्षेत्रमा मजदुरी गरेर लकडाउनपछि घर फर्किन लागेका नेपाली धार्चुलामै रोकिएका हुन् । भारतीय भूमिमा अलपत्र परेका नेपालीले महाकाली पुलपारि नाराबाजी गरिरहेका छन्। अलपत्र नेपाली दार्चुलाका अलावा बैतडी, बझाङलगायतका रहेको बताइएको छ। भारत र नेपाल दुबै तिर लकडाउन भएका कारण उनीहरु सीमा क्षेत्रमै फसकेका हुन्।
सीमा क्षेत्रमा अलपत्र परेका नेपालीले नेपाल प्रवेशको माग गर्दै नाराबाजी गरिरहेको भिडियो सामाजिक सञ्जालमा भाइरसल बनेको छ। उक्त भिडियो सार्वजनिक भएपछि पूर्व प्रधानमन्त्री डा बाबुराम भट्टराई तथा नेपाली काँग्रेसका सभापति शेरबहादुर देउवाले ध्यानाकर्षण जनाउनुभएको छ।
जसले विदेशमा रगतपसिना बेचेर देशको अर्थतन्त्र धानेका छन् तिनैले घर फर्कननिम्ति नाराबाजी गर्नपर्नु कति लाजमर्दो कुरा? भौतिक दूरी कायम गर्नुपर्ने वेला यस्तो ठेलमठेल कति जोखिमपूर्ण?सबै काम छोडेर पनि सरकारी संयन्त्रले यसमा तुरून्त ध्यानदिनुपर्ने हैन?अब त कुम्भकर्णे निद्राबाट उठ सरकार! https://t.co/iyOU9OpC5C
— नियमित हात धोऔं / Wash your hands ! (@brb1954) March 30, 2020
आफ्नो देशमा आउन पनि नारा जुलुश गर्नुपर्ने यो के हो? दार्चुला सदरमुकाम पारी भारतको धार्चुलामा रहेका सयौ नेपालीहरुलाई आवस्यक प्रक्रिया पुरा गरेर तत्काल नेपाल आउने वातावरण बनाउन म सरकारसँग जोडदार माग गर्दछु। https://t.co/YmcFVRzSPR
— Sher Bahadur Deuba (@DeubaSherbdr) March 30, 2020
दार्चुलाका प्रमुख जिल्ला अधिकारी (प्रजिअ) यदुनाथ पौडेलले भारतको मिथौरागढलगायत क्षेत्रबाट लकडाउनपछि फर्किएका ४५० बढी नेपाली नेपालपारि धार्चुलामा रोकिएको स्वीकार गर्नुभएको छ।
