कर्मचारीको तलब बढाएर भ्रष्टाचार घट्दैन : मन्त्री खतिवडा

प्रकाशित मिति : १५ फाल्गुन २०७६, बिहिबार  १० : ३७


काठमाडौं । अर्थमन्त्री एंव सञ्चार तथा सूचना प्रविधि मन्त्री डाक्टर युवराज खतिवडाले विकास खर्च गत बर्षको तुलनामा कम नभएको स्पष्ट पार्नुभएको छ।

सञ्चार तथा सूचना प्रविधि मन्त्रालयमा विहिबार नेपाल सरकारको मन्त्रीपरिषद्का निर्णय सार्वजनिक कार्यक्रममा उहाँले समग्र मुलुकको एकिकृत वित्तिय विवरणले विकास खर्च राम्रो भएको देखाएको बताउनुभएको हो।

उहाँले आर्थिक बर्षको अन्त्य सम्ममा बजेटको ९० प्रतिशत भन्दा बढी खर्च हुने दाबी गर्नुभयो।

निर्माण व्यवसायी, ठेक्का पट्टा सम्बन्धी विवाद लगायतका कारण आर्थिक बर्षको सुरुवाती दिनमा विकास खर्च हुन नसकेपनि पछिल्लो अवस्था सन्तोषजन रहेको उहाँले दाबी गर्नुभयो।  

पुर्व संञ्चारमन्त्री गोकुल बाँस्कोटाको ७० करोड कमिसन सम्बन्धी अडियो प्रकरण छानविनका सम्बन्धमा संचारकर्मीले सोधेको प्रश्नको उत्तर दिदै मन्त्री खतिवडाले सरोकारित र सम्बन्धीत निकायहरुले अध्ययन गरिरहकाले उनीहरुबाट आउने नतिजा पर्खन आग्रह गर्नुभयो । उहाँले भन्नुभयो “मिश्रित धारणाहरु आईरहेका छन्। अख्यिारयारलाई पनि थाहा छ । संसदीय समितिलाई थाहा छ । संबैधानिक ,कानुनी र संस्थागत विधिबाट निक्र्योल हुन दिउँ । कानुनी अधिकार प्राप्त निकायले अध्ययन गरोस्।”

ठूला भ्रष्टाचार अभावजन्य भ्रष्टाचार नभएको भन्दै उहाँले कर्मचारीको तलब बढाएर साना साना भ्रष्टाचार घटाए पनि त्यसले समग्र मनोवृति परिर्वतन नगर्ने स्पष्ट पार्नुभयो।

पुस्तक विक्रिमा लगाएको करका सम्बन्धी संचारकर्मीको जिज्ञासामा उहाँले राष्ट्रिय उद्योग र सेवा उद्योगलाई संरक्षण दिन सरकारले कर लगाएको बताउनुभयो।

पुस्तक विक्रिमा धेरै मुलुकले मुल्य अभिवृद्धि कर लगाउने गरेको र त्यो कर  १८ प्रतिशत सम्म रहेको उल्लेख गर्दे उहाँले अरबौ रुपैया लगानी गरेर स्वदेशमा स्थापना भएका प्रेसले गर्ने कागज आयातमा पनि कर लगाएकाले पुस्तकमा लगाईएको कर जाहेज भएको बताउनुभयो।

उहाँले पुस्तकको विक्रि व्यापार भएकाले सरकारले ज्ञानमा कर लगायो भनेर भ्रम फैलाउने काम नगर्न सचेत गराउनुभयो। उहाँले भन्नुभयो “पुस्तकको व्यापार हो ज्ञानको व्यापार होइन ज्ञानको व्यापार भनेर दिग्भ्रमित नगरौ।”

मौरिससबाट आउने लगानी रोकिएको सम्बन्धमा उहाँले स्रोत खुलेका र बैकिङ प्रणालीबाट आउने लगानी प्रभावित नहुने स्पष्ट पार्नुभयो। संचारकर्मीले मौरिससबाट आउने लगानी रोक्दा समग्र अर्थतन्त्रमा प्रतिकुल प्रभाव पार्न सक्ने भन्दै त्यसबारे जिज्ञासा राखेका थिए । 

त्यस्तै उहाँले राष्ट्रबैकको गर्भनर नियुक्तिमा भएको ढिलाई बारे संचारकर्मीको जिज्ञासामा चैत ५ भन्दा अगाडि नै नियुक्त हुने बताउनुभयो ।


प्रतिक्रिया दिनुहोस्