अफगानिस्तानमा दुई अमेरिकी सैनिक मारिए

प्रकाशित मिति : २६ माघ २०७६, आइतबार  १० : २८


काठमाडाैं । हातहतियारबाट सुसज्जित एक अफगानी सैनिकले चलाएको गोली लागेर अफगानिस्तानमा तैनाथ दुई जना अमेरिकी सैनिकको मृत्यु भएको छ । साथै अन्य छ जना घाइते भएका छन् । अमेरिकी सेनाका अनुसार अफगानिस्तानको पूर्वी नान्गारहार प्रान्तमा शनिबार उक्त दुःखद घटना भएको हो ।

शरजाद जिल्लाको सैनिक अखडामा अमेरिकी र अफगान कमान्डोहरुले तालिम गरिरहेका बखत अफगान सैनिक कमान्डोले गोली चलाएका थिए । अमेरिकी राष्ट्रपति डोनाल्ड ट्रम्पले १८ वर्ष लामो अफगान युद्ध समाप्त गरी अमेरिकी सैनिक स्वदेश फर्काउने योजना बनाइरहेको नाजूक समयमा उक्त घटना भएको हो ।

अफगानिस्तानमा तैनाथ अमेरिकी फौजका प्रवक्ता सोन्नी लेगिटले आइतबार जारी गरेको वक्तव्यमा अफगानी सैनिकले चलाएको गोलीबाट अमेरिकी सैनिकको मृत्यु भएको र केही घाइते भएको उल्लेख छ । प्रान्तीय गभर्नर शाह महमूद मियाखिलले अफगान सैनिकको आक्रमणबाट तीन जना अफगान सैनिक पनि घाइते भएको बताउँदै घटनाको अनुसन्धान शुरु गरिएको जानकारी दिए ।

अफगान सैनिकलाई हवाई सेवा, परामर्श र तालिमका कार्यमा मात्र केन्द्रित गरिरहेको अमेरिकी सैनिकमाथि सन् २०१९ मा भएका आक्रमणमा २० जनाको ज्यान गएको थियो । सन् २००१ मा अफगानिस्तानमा अमेरिकी सेनाले आक्रमण गरेयता अफगानिस्तानमा करिब दुई हजार ४०० अमेरिकी सैनिकको मृत्यु भइसकेको छ ।

अफगानिस्तानका विद्रोही तालिबान समूहसँग अमेरिकी विशेष दूत जाल्मे खलिलजादले विगत १८ महिनादेखि वार्ता र सम्वाद गर्दै आएका छन् । वार्तामा खासगरी अमेरिकी सैनिकको संख्या आधा कम गर्ने र विनाशर्त युद्ध विराम गर्ने बारेमा विचार विमर्श भइरहेको छ ।

तालिबान समूहले वार्ताकै चरणमा पनि अमेरिकी फौज लक्षित गरी आक्रमण गरेपछि अमेरिकी राष्ट्रपति डोनाल्ड ट्रम्पले उक्त वार्ताको औचित्य नरहेको भन्दै वार्ता भंग भएको घोषणा गरेका थिए । तर अहिले फेरि कतारमा तालिबान र अमेरिकी मध्यस्थकर्ताबीच वार्ता जारी छ ।


प्रतिक्रिया दिनुहोस्