काठमाडौं । विप्लव नेतृत्वको नेकपाका केन्द्रीय सदस्य तथा तत्कालीन उपत्यका विशेष ब्युरो इन्चार्ज माइला लामा फेरि पक्राउ परेका छन् ।
लामालाई पाटन उच्च अदालतको गेटबाटै प्रहरीले पुनः पक्राउ गरेको छ ।
गत बिहिबार पाटन उच्च अदालतले माइला लामा सहितका चार नेतालाई रिहा गर्न आदेश दिएको थियो।
पाटन उच्च अदालतले लामासँगै नेकपा अर्का केन्द्रीय सदस्य नवीन विश्वकर्मा, धीरेन्द्राकुमारी उपाध्याय र ईश्वर परियारलाई रिहा गर्न आदेश गरेको थियो।
आज रिहा भएसँगै अदालत परिसरबाटै प्रहरीले फेरि प्रकाउ गरेको हो।
एनसेलको केन्द्रीय कार्यालयमा बम विस्फोट गराएको घटना र राज्यविरुद्धको अपराधमा दोषी ठहर गर्दै उनीहरुलाई यसअघि पक्राउ गरिएको थियो।
जिल्ला अदालत ललितपुरले पूर्पक्षका लागि थुनामा राख्न आदेश दिएको थियो।
उक्त अदालतको आदेश विरुद्ध परिवार उच्च अदालत गएको थियो ।
उच्च अदालतका मुख्य न्यायाधीश नहकुल सुवेदी र न्यायाधीश श्रीकान्त पौडेलको इजलासले गत बिहीबार चारजनालाई निर्दोष ठहर गर्दै रिहाइको आदेश दिएको हो ।
तर आइतबार प्रहरीले अदालतको आदेश लत्याएरै उनीहरुलाई पुनः पक्राउ गरेको छ।
