महोत्तरीको भंगाहामा मुस्लिम र हिन्दु समुदायबीच भयो यस्तो सहमति…

प्रकाशित मिति : ११ कार्तिक २०७९, शुक्रबार  २ : ४३


काठमाडौं । महोत्तरीको भंगाहा नगरपालिकामा मुस्लिम समुदाय र हिन्दु समुदायबीच सहमति जुटेको छ । शुक्रबार दुई पक्षबीच ८ बुँदे सहमति भएको हो ।

असमझदारी र झडपको स्थितिलाई नियन्त्रण गरी सामाजिक सद्भाव कायम गर्न घटनामा सम्बद्ध दुबै पक्षलाई र आम नागरिकलाई आह्वान गर्ने सहमति भएको महोत्तरीका प्रमुख जिल्ला अधिकारी दीपककुमार पहाडीले जानकारी दिए ।

यस्तो छ सहमति पत्र-

झगडाको सुरुवात कसरी भयो ?

मोहम्मद डेको एक दिन अगाडि अर्थात् २३ असोजमा स्थानीय किशोरी यादवले एक्का लगाउने तयारी गरे । एक्का लगाउन छिमेकीलाई सबै खबर गरेर तयारी अन्तिम चरणमा पुगेको बेला मुस्लिम धर्मावलम्बीका मसरिम राइन र रफिक आलमले एक्का लगाउँदा आफूहरूलाई डिस्टर्व हुने भन्दै रोक्न आग्रह गरे ।

किशोरी यादवका छोरा विदेशबाट छुट्टीमा आएका थिए । छुट्टीमा आएकोवेला एक्का लगाउँदा राम्रो हुने धार्मिक विश्वास अनुसार एक्का लगाएर नै छोरालाई पठाउने किशोरीको योजना थियो ।

यसबीचमा मसरिम र रफिक पटक-पटक एक्का नलगाउनु भन्दै रोक्न आए तर किशोरीले आफ्नो धार्मिक स्वतन्त्रतामा कसैले हस्तक्षेप गर्न नसक्ने भन्दै एक्का लगाएर नै छाडे ।

यहीँबाट स्थानीय मुस्लिम समुदाय र हिन्दु समुदायबीच तितोपना बढ्दै गएको थियो । भित्र-भित्रै उनीहरू आगो जसरी सल्किएका थिए । काहीँ न काहीँ उनीहरूबीच झगडा हुन सक्ने भन्दै स्थानीयमा त्रास बढ्दै गएको थियो ।

यो विषयमा नगरप्रमुख सञ्जीव साहले पनि निगरानी बढाउँदै लगे । यसैबीच आज हिन्दु सम्राट सेनाले शोभा यात्रा निकाल्ने पूर्व निर्धारित कार्यक्रम थियो ।

यही यात्रा नै झगडाको कारक बन्न सक्ने भन्दै नगरप्रमुख साह निक्कै सचेत थिए । हिन्दु सम्राट सेनाका केही व्यक्तिलाई बोलाएर यसअघि नै उक्त शोभा यात्रा ननिकाल्न अनुरोध पनि गरे तर उनीहरूले त्यसलाई अस्वीकार गरे ।

नगरप्रमुख साहले नेपाल प्रहरी र सशस्त्र प्रहरी दुबैलाई घटनाको विषयमा जानकारी गराए । सोभायात्रा निक्लनु अगाडि नै सशस्त्र प्रहरी र नेपाल प्रहरी यात्रा गर्ने वरपर तैनाथ गरिएको थियो ।

पहरिया चोक जस्तो सार्वजनिक ठाउँमा राखेको मुस्लिम झण्डालाई लिएर यसअघि पनि हिन्दु र मुस्लिमबीच विवाद भएको थियो ।

सार्वजनिक ठाउँमा गाडिएको उक्त झन्डालाई लिएर नगरप्रमुख साहले मुस्लिम समुदायका अगुवाहरूलाई बोलाएर कयौँ पटक छलफल पनि चलाए । सार्वजनिक ठाउँमा बरु नेपालको झण्डा राखौँ भन्ने उनको सुझाव थियो ।

नगरप्रमुख साहले जातीय दंगा भड्कन सक्ने भन्दै उक्त झण्डा हटाउन आदेश पनि दिन सकेनन् । तर शोभा यात्रामा सहभागीको तगारो सोही मुस्लिम झण्डा बन्यो ।

हिन्दु सम्राट सेना हिन्दुहरूलाई मुस्लिम समुदायले गरेको हस्तक्षेपलाई लिएर प्रतिकार गर्ने तयारी गरिरहेका थिए । उनीहरूले यही मुस्लिम झन्डालाई नै कारक बनाए र त्यहाँ उनीहरूले आफूहरूको झण्डा पनि गाड्ने तयारी गरे । त्यसपछि झगडाले उग्ररुप लियो ।


प्रतिक्रिया दिनुहोस्