अध्यक्ष लीको सम्मानमा सभामुख सापकोटाद्वारा रात्रिभोज

प्रकाशित मिति : २७ भाद्र २०७९, सोमबार  ९ : ५१


सङ्घीय संसद्का सभामुख अग्निप्रसाद सापकोटाले नेपाल भ्रमणमा रहेका चीनको राष्ट्रिय जनकंग्रेसका अध्यक्ष ली चान्शुको सम्मानमा आज साँझ रात्रिभोजको आयोजना गरेका छन्।

रात्रिभोजमा सभामुख सापकोटाले सङ्घीय संसद्को नेतृत्वको आमन्त्रणमा नेपाल भ्रमण गरेकोमा अध्यक्ष लीप्रति आभार प्रकट गरे। उनले यस्तो उच्चस्तरीय भ्रमणले दुई देशबीचको सम्बन्ध नयाँ उचाइमा पुग्ने र जनता जनताबीचको सम्बन्धमा समेत नयाँ आयाम विस्तार हुने विश्वास व्यक्त गरे।

चिनियाँ जनकंग्रेसको अध्यक्षका रुपमा नेपाल भ्रमण गर्ने आफू नै पहिलो व्यक्ति भएको भन्दै लीले नेपालले गरेको आमन्त्रण र स्वागतप्रति धन्यवाद व्यक्त गरे। नेपालका तर्फबाट आफूले पाएको न्यानो स्वागत र आथित्यताप्रति उनले कृतज्ञता व्यक्त गरे।

रात्रिभोजमा नेकपा (माओवादी केन्द्र)का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’, नेकपा (एकीकृत समाजवादी)का अध्यक्ष माधवकुमार नेपाल र सम्मानित नेता झलनाथ खनाल, नेकपा (एमाले)का संसदीय दलका उपनेता सुवासचन्द्र नेम्वाङ, गृहमन्त्री बालकृष्ण खाण, ऊर्जा जलस्रोत तथा सिँचाइमन्त्री पम्फा भुसाल, सङ्घीय सांसद्का सांसदहरू, पराष्ट्र मन्त्रालयका अधिकारी सङ्घीय संसद् सचिवालयका महासचिव एवं कर्मचारी, लब्ध प्रतिष्ठित व्यक्ति एवं सञ्चारकर्मीको सहभागिता थियो।

त्यसअघि सभामुख सापकोटा र अध्यक्ष ली बीच सङ्घीय संसद् भवन नयाँ बानेश्वरमा छ बुँदे सहमतिपत्रमा हस्ताक्षर भएको थियो। सभामुख सापकोटा र अध्यक्ष ली बीच भेटवार्ता सकिएपछि प्रतिनिधिमण्डलस्तरीय वार्ता भएको थियो।

भेटवार्ताका क्रममा सभामुख सापकोटाले नेपालको आर्थिक विकासमा चीन सरकार र चिनियाँ जनताका तर्फबाट उपलब्ध गराइएको सहयोगप्रति धन्यवाद व्यक्त गरेका थिए। कोरोना महामारीका समयमा चीन सरकारको तर्फबाट उपलब्ध सहयोगप्रति पनि सभामुखले आभार प्रकट गरेका थिए।

सभामुख सापकोटाले नेपाल सधैँ एक चीन नीतिप्रति प्रतिबद्ध रहेको तथा नेपालको भूभागमा चीन विरोधी गतिविधि हुन नदिने पूर्ववत् मान्यताको समेत स्मरण गरे।

अध्यक्ष लीले चीन सदैव नेपालको स्वतन्त्रता, सार्भभौमसत्ता, अखण्डतालाई सम्मान गर्दै निरन्तर सहयोग र सहकार्यमा रहेकोे बताएका थिए। दुई देशबीच बहुआयामिक माध्यमबाट सबै तहमा अन्तरसंसदीय आदानप्रदान र सहयोग सुदृढ गर्न प्रतिबद्ध रहेकोसमेत त्यस अवसरमा विचार आदान प्रदान भएको थियो।

दुई देशका जनप्रतिनिधिहरुको शीर्ष नेतृत्वबीच यस्तो खालको द्विपक्षीय छलफल र भेटवार्तालाई पनि ऐतिहासिक घटनाक्रमका रुपमा लिने विश्वास गर्न सकिन्छ।

यस्तै त्यसअवसरमा चिनियाँ राष्ट्रपतिले अगाडि सारेको बीआरआईका विषयमा समेत त्यस अवसरमा छलफल भएको थियो। संयुक्त सहमतिमा पनि सो विषयले स्थान पाएको छ। यस्तै, सहयोग आदानप्रदानका विविध विषयका अलावा नेपालको आर्थिक विकास एवं समृद्धिका विविध आयामका बारेमा पनि महत्वपूर्ण छलफल भएको थियो।

यस्तो छ थप कार्यक्रम

राष्ट्रियसभाका अध्यक्ष गणेशप्रसाद तिमिल्सिना र अध्यक्ष ली बीच मङ्गलबार बिहान नौ बजे सङ्घीय संसद् भवनमा भेटवार्ताको कार्यक्रम तय भएको छ।

सङ्घीय संसद् भवनमा नै नेकपा (एमाले)का अध्यक्ष केपी शर्मा ओलीसँग शिष्टाचार भेटवार्ता गर्नेछन्।

सङ्घीय संसद् भवनमा नै नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ सँग पनि शिष्टाचार भेटवार्ताको कार्यक्रम तय भएको छ । यस्तै मङ्गलबार परराष्ट्रमन्त्री डा.नारायण खड्कासँग सोल्टी होटलमा भेटवार्ताको कार्यक्रम तय भएको परराष्ट्र मन्त्रालयले जनाएको छ।

मङ्गलबार अपराह्न प्रधानमन्त्री शेरबहादुर देउवासँग अध्यक्ष लीले शिष्टाचार भेटवार्ता गर्नेछन्।

प्रधानमन्त्री तथा मन्त्रिपरिषद् कार्यालयमा शिष्टाचार भेटवार्ताको कार्यक्रम तय भएको परराष्ट्र मन्त्रालयले जनाएको छ।

बुधबार राष्ट्रपति विद्यादेवी भण्डारीसँग अध्यक्ष लीले शिष्टाचार भेटवार्ता गर्नेछन्। अध्यक्ष लीले भक्तपुर दरबार क्षेत्रको समेत भ्रमण गर्ने कार्यक्रम तय भएको छ।

नेपालको चार दिने भ्रमणका क्रममा अध्यक्ष ली आज अपराह्न यहाँ आइपुगेका हुन। सभामुख सापकोटाको निमन्त्रणामा आज यहाँ आइपुगेका अध्यक्ष ली चिनियाँ कम्युनिष्ट पार्टीको दोस्रो तहका शीर्ष नेता हुन। चिनियाँ राष्ट्रपतिको नेपाल भ्रमणपछि यहाँ आउने शीर्ष चिनियाँ नेतामध्ये उनी एक हुन। रासस


प्रतिक्रिया दिनुहोस्