नेपाली सेना र अमेरिकी सेनाको संयुक्त तालिम भोलिबाट

प्रकाशित मिति : ३० श्रावण २०७९, सोमबार  ९ : ४४


काठमडाौं । नेपाली सेना र अमेरिकी सेनाबीच भोलिबाट संयुक्त तालिम सञ्चालन हुने भएको छ।

संयुक्त सैनिक अभ्यासका लागि १६ जना अमेरिकी सेना नेपाल आइपुगेका छन्।

भोलि (मंगलबार) काठमाडौं र नगरकोटमा हुने संयुक्त सैन्य अभ्यासका लागि उनीहरु नेपाल आइपुगेको नेपाली सेनाले जनाएको छ।

नेपाली सेनाको सिंह महावीर योजना तथा समन्वय महाशाखाअन्तर्गत रहेका रेञ्जर गण र अमेरिकी सेनाको टुकडीबीच आगामी भदौ ३१ गतेसम्म संयुक्त तालिम अभ्यास सञ्चालन हुने सैनिक जनसम्पर्क तथा सूचना निर्देशनालयले जनाएको छ।

सेनाका अनुसार, २०६० सालदेखि नै नेपाली सेना र अमेरिकी सेनाबीच सञ्चालन हुँदै आएको तालिम रक्षा मन्त्रालयको स्वीकृतिमा सञ्चालन हुन लागेको हो।

नेपाली सेनाका ८० तथा अमेरिकी सेनाका १६ जना सम्मिलित उक्त संयुक्त अभ्यासका क्रममा द्वन्द्वका समयमा कानुन कार्यान्वयन तथा सैनिकको निर्णय प्रक्रिया लगायतका विषयमा केन्द्रित रही छाउनी र नगरकोट इलाकामा सञ्चालन हुनेछ।

तालिमका लागि क्याप्टेन ब्लाक डुक्याटेलको नेतृत्वमा आवश्यक सैन्य सामग्रीसहित अमेरिकी सेनाको टुकडी आज नेपाल आइपुगेको निर्देशनालयले जनाएको छ।


प्रतिक्रिया दिनुहोस्