बालेनको प्रश्नः फोहोर व्यवस्थापनमा असफल बनाउने खेल किन हुँदैछ?

प्रकाशित मिति : २९ श्रावण २०७९, आइतबार  ८ : २५


काठमाडौं । काठमाडौं महानगरपालिकाका मेयर बालेन शाहले काठमाडौंको फोहोर व्यवस्थापनमा केन्द्र सरकारबाट नै असहयोग मिलिरहेको गुनासो गरेका छन्।

उनले सामाजिक सञ्जाल फेसबुक मार्फत फोहोरमा राजनीति नगर्न र गरिए त्यसले राम्रो नगर्ने समेत बताएका छन्।

उनले धादिङको धुनीबेसी नगरपालिकाका नेपाली कांग्रेस, नेकपा माओवादी केन्द्र र नेकपा एकीकृत समाजवादी दलले संयुक्त रुपमा जारी गरेको पत्र सेयर गर्दै फोहोर व्यवस्थापनका लागि स्थानीयस्तरमा संरचना बनाइएको तथा मुआब्जालगायत सहमति पनि भइसकेको बताएका छन्।

यस्तो छ मेयर बालेनको फेसबुक स्टाटस

हामीले हिजो जानकारी गराएका थियौँ कि केहि अबरोध नभएमा आजबाट दैनिक २५० देखि ३५० फोहोर बोक्ने गाडीहरुले बञ्चरे डाँडामा फोहोर लैजाने छन्। तर, आज दुई स्थानमा अलग अलग कारणले सडक अवरुद्ध गरियो । यसैले आज ९० वटा फोहोरका गाडीहरु मात्र बञ्चरे डाँडा पुग्न पाए।

आज दुई ठाउँमा सडक अवरुद्ध गर्नुका दुई कारणहरु थिए।

१) कसैले फोहोर पानीको मुहानमा लगेर फ्यालिदियो भन्ने। यसमा दोषीलाई पत्ता लगाएर कारबाही पनि भइसक्यो।

२) फोहोर बोक्ने गाडीले बाख्रा मारेको भन्ने। यसलाई पनि समाधान गर्यौँ। यी दुई अवरोध हटाउने बित्तिकै अर्को अवरोधको कसरत हुँदै गरेको भन्ने जानकारी पाएका छौँ।

वास्तवमै त्यो कसरत हो भने त्यो बिडम्बनापुर्ण हुनेछ। बञ्चरे डाँडमा फोहोर व्यवस्थापनका लागि कतिपय संरचनाहरु बनिसकेका छन्। भुमि लिन तथा संरचना निर्माणमा र प्रभावितहरुले पाउने सुविधा तथा मुअब्जा जस्ता काममा ५ अर्ब खर्च भइसकेको छ। यो झुक्याएर गरिएको पनि थिएन। यसका वैधानिक सम्झौताहरु छन्। ति सम्झौताहरुको पालना गर्नु सबैको कर्तव्य हो ।

सँगसँगै, हामीले र हाम्रो संविधानले जुन राज्य प्रणालीको परिकल्पना गरेको छ, त्यसमा एउटा सरकारको तह र अर्को तहको आपसी समन्वय तथा मेलमिलापको नै कल्पना गरिएको छ। यसका विपरित एउटा सरकारले अर्को तहको सरकारलाई असहयोग गर्नु पर्ने, असफल नै बनाउनु पर्ने खेल किन गरिन्छ? हामी त्यति धेरै असभ्य र स्वार्थी किन छौँ? फोहोरको रास लगाएर त्यो भित्र झन् कुहिएको खेल खेलेर त्यसलाई राजनीतिको नाम नदिउँ। राजनीति त्यस्तो हुदैन। त्यस्तो राजनीतिले कसैलाई अगाडि बढाउँदैन। यसमा हेक्का राखौँ।


प्रतिक्रिया दिनुहोस्