सेप्टेम्बर ११ हमलाका मास्टरमाइन्डमध्ये एक अल–कायदाका नेता अल–जवाहिरी मारिए

प्रकाशित मिति : १७ श्रावण २०७९, मंगलबार  ११ : २२


काबुल। अमेरिकी कारबाहीमा अल कायदाका नेता अयमान अल–जवाहिरी मारिएका छन्।

अफगानिस्तानको राजधानी काबुलमा अमेरिकी सेनाको हवाई हमलामा उनी मारिएका हुन्। अमेरिकी कारबाहीमा उनी मारिएको अमेरिकी राष्ट्रपति जो बाइडेनले पुष्टि गरेका छन्। देशका नाममा गरेको एउटा सम्बोधनमा उनले अल कायदा नेता जवाहिरी मारिएको पुष्टि गरेका हुन्।

इजिप्टका नागरिक जवाहिरी संसारको सबैभन्दा कुख्यात आतंकवादीमध्ये एक थिए। उनी अमेरिका मा सेप्टेम्बर ११ को हमलाका मास्टरमाइन्ड रहेको अमेरिकाले दाबी गर्दै आएको थियो।

सन् २००१ को सेप्टेम्बर ११ मा अमेरिकी ट्वीन टावरमा भएका आत्मघाती हमलामा करिब ३ हजार जनाको ज्यान गएको थियो।

सन् २०११ मा पाकिस्तानमा ओसामा बिन लादेन मारिएपछि उनी फरार थिए र अलकायदालाई हाँकेका थिए। अमेरिकाले उनको टाउकोको मूल्य २५ मिलियन डलर इनाम तोकेको थियो। एजेन्सी

Biden says U.S. strike in Kabul killed a planner of 9/11 attacks | The Japan Times


प्रतिक्रिया दिनुहोस्