काठमाडौं महानगरले सडकमा खानेकुरा बेच्न नदिन प्रहरीसँग सहकार्य गर्ने

प्रकाशित मिति : १४ असार २०७९, मंगलबार  २ : ४७


काठमाडौं । काठमाडौं उपत्यकामा हैजाका बिरामी देखिन थालेपछि महानगरपालिकाले गुनासो सुन्न हटलाइन नै सञ्चालन गरेको छ।

महानगरको हटलाइन ११८० मा बजारमा पाइने जार र बोतलमा प्याकिङ् गरिएको पानीको शुद्धता बारे नागरिकले प्रश्न सोध्ने गरेको महानगरले जनाएको छ।

शुद्धताका लागि मूल्य तिरेर किनेको पानी शुद्ध भएन भने किनेर पानी किन खाने? शंखमुलबाट फोन गर्ने व्यक्तिको प्रश्न थियो। यो प्रश्नको उत्तरमा महानगरका स्वास्थ्यकर्मीको जवाफ थियो, ‘पानी जहाँको होस, उमालेर मात्र प्रयोग गर्नुहोस्।’

फोनमा जिज्ञासुहरुले काठमाडौँका कुन — कुन ठाउँमा हैजा फैलिएको छ? ब्लिचिङ् पाउडर के हो? कसरी प्रयोग गर्ने, यो पाउडर वितरण भएको छ कि छैन? पानी जाँच कहाँ गर्ने? हैजाका लक्षण के हुन्रु प्राथमिक उपचार के गर्ने?, घरमै केही औषधि छ कि जस्ता जस्ता प्रश्न गर्ने गरेको महानगरले जनाएको छ। त्यसैगरी पानी कसरी शुद्ध गर्ने, शुद्ध गर्ने औषधिले स्वास्थ्यमा नकारात्मक असर गर्छ कि गर्दैन? जस्ता जानकारी माग्ने गरेका छन्।

महानगरले कल सेन्टरमा स्वास्थ्य सम्बन्धी सूचना दिन २४ सै घण्टा टोल फ्रि नंम्बर ११८० सञ्चालन गरेको हो।

महानगरमा हैजा रोकथाम गर्न सडकमा खानेकुरा बेच्न निषेध गरेको छ। पानीको स्वच्छता र वातावरणीय सरसफाइसँगै सेचतनामुलक र उपचारका कार्यक्रम गरिरहेको छ। यसका लागि हैजाको प्रकोप भएको ठाउँमा सचेतनामुलक कार्यक्रम सञ्चालन गर्न सम्बन्धित वडाका महिला स्वास्थ्य स्वयमसेविका र वास स्वयमसेवक परिचालन गर्ने तथा सरोकारवालासँग सहकार्य गर्ने निर्णय भएको छ।

हैजा खानेकुरा र पानीबाट सर्ने भएकोले खानेकुरा तथा पानीको शुद्धतालाई निगरानी गरिनेछ। यसका लागि महानगरले सडकमा खानेकुरा बेच्न नदिन नेपाल प्रहरीसँग सहकार्य गर्ने भएको छ।

होटल रेष्टुरेन्टको खाद्य स्वच्छता हेर्न खाद्य प्रविधि तथा गुण नियन्त्रण विभागलाई अनुरोध गरेको छ।

यस्तै पानीको पाइपलाइन तथा ढल प्रणालीको चुहावट ढल फुटेर पानीमा मिसिएको अवस्था हेर्न र सुधार गर्न काठमाडौँ उपत्यका खानेपानी लिमिटेडलाई अनुरोध गरेको छ।


प्रतिक्रिया दिनुहोस्