0
Shares
व्यावसायिक रुपमा सञ्चालनको तयारी भइरहेको भैरहवास्थित गौतमबुद्ध अन्तर्राष्ट्रिय विमानस्थल सञ्चालन पूर्व तयारीबारे नियामक निकाय नेपाल नागरिक उड्डयन प्राधिकरणले आज सरोकारवाला एयरलाइन्ससँग छलफल गरेको छ ।
गौतमबुद्ध अन्तर्राष्ट्रिय विमानस्थल सञ्चालन तयारी कार्यदलले अन्तर्राष्ट्रिय वायुसेवा प्रदायक कम्पनीका प्रमुख एवं प्रतिनिधिसँग छलफल गरेको हो । अन्तर्राष्ट्रिय मापदण्ड बमोजिम विमानस्थल सञ्चालन पूर्व गर्नुपर्ने तयारी र अभ्यासलाई मध्यनजर गरी कार्यदलले नेपालमा उडान भर्ने वायुसेवा प्रदायक कम्पनीका प्रतिनिधिसँग रायसुझाव लिइएको कार्यदलका संयोजक प्रतापबाबु तिवारीले जानकारी दिनुभयो ।
त्रिभुवन अन्तर्राष्ट्रिय विमानस्थलमा अहिले तीन नेपालीसहित २८ वायुसेवा प्रदायक कम्पनीले उडान भर्दै आएका छन् । छिट्टै थप तीन अन्तर्राष्ट्रिय एयरलाइन्सले उडान भर्ने तयारी गरेका छन् । नयाँ विमानस्थल सञ्चालन आउनुअघि एयरलाइन्सका प्रतिनिधिसँगको व्यावसायिक अभ्यासलाई मध्यनजर गरी उनीहरुको सुझाव महत्वपूर्ण हुने भएकाले छलफल गरिएको संयोजक तिवारीले बताउनुभयो।
सो अवसरमा प्राधिकरणकोतर्फबाट विमानस्थलको भौतिक काम सकेर उपकरण जडानको अवधिभित्र सबै तयारी गरेर उडानयोग्य बनाउन एयरलाइन्सलाई आग्रह गरेको थियो । विमानस्थलले उपलब्ध गराउने सुविधामा कुनै कमी आउन नदिने, विमानस्थलको सबै सेवालाई सुरक्षित, व्यवस्थित र चुस्त बनाउन प्राधिकरणले कुनै कसुर बाँकी नराख्ने प्रतिबद्धता जनाइएको थियो ।
जवाफमा एयरलाइन्सले विमानस्थल कहिले सञ्चालनमा आउने र के कस्ता आकर्षक सहुलियत प्याकेज हुन्छन् त्यसबारे प्राधिकरणसँग धारणा मागेका थिए । अन्तर्राष्ट्रिय हवाई मापदण्डअनुरुप वर्षमा दुई पटक मार्च र अक्टोबर महिनामा विमानस्थलको उडान तालिका बनाइन्छ । सोही तालिकालाई ‘मिट’ गर्नेगरी गौतमबुद्ध अन्तर्राष्ट्रिय विमानस्थल सञ्चालनमा आउनेछ । त्यो भनेको सन् २०२० को मार्च महिना हो । यो विमानस्थल मार्च महिनाभित्रै सञ्चालनमा ल्याउनेगरी काम भइरहेको छ ।
हाल विमानस्थलको भौतिक प्रगति ९० प्रतिशत भन्दामाथि छ । संस्कृति, पर्यटन तथा नागरिक उड्डयनमन्त्री योगेशकुमार भट्टराईले केही दिनअघि रासससँगको कुराकानीमा गौतमबुद्ध विमानस्थल पूर्वनिर्धारित समयअनुरुपनै सञ्चालनका लागि सरकारले आवश्यक तयारी गरिरहेको बताउनुभएको थियो ।
एयरलाइन्सका प्रतिनिधिले विमानस्थल सञ्चालनपूर्व चारदेखि छ महिनाअघिनै पूर्व तयारी चाहिने बताएका थिए । उनीहरुले सेवा सञ्चालनका लागि आकर्षक प्याकेज कस्ता छन् भूमिस्त सेवा, क्याटरिङ, लाउन्जस्तरीय हुन्छन् की हुदैनन् जस्ता प्रश्न उठाएका थिए । हालको त्रिभुवन अन्तर्राष्ट्रिय विमानस्थलजस्तो समस्या दोहोरिन नहुने पनि उनीहरुले सुझाएका थिए । प्राधिकरणले विमानस्थलको कुनै पनि सेवामा सम्झौता नगर्ने सुरक्षालगायतलाई विशेष प्राथमिकता दिने प्रतिबद्धता जनाएको थियो ।
