कञ्चनपुर । सत्तारूढ दल नेकपा निकट अनेरास्ववियूले नेपाल भ्रमण वर्ष सफल पार्न आफ्ना सम्पुर्ण नेता, कार्यकर्ता र आम विद्यार्थीलाई परिचालित हुन आह्वान गरेको छ ।
अनेरास्ववियूका केन्द्रीय सहसंयोजक रञ्जित तामाङले नेपाल भ्रमण वर्ष राष्ट्रिय गौरवको उत्सव भएकाले नेता कार्यकर्तालाई स्वयंसेवकका रुपमा परिचालित गर्ने निर्णय भएको जानकारी दिनु भयो ।
तामाङले नेपाल भ्रमणमा आउने विदेशी पाहुनाहरुलाई आआफ्नो ठाउँमा न्यानो आतिथ्यता प्रदान गर्न विद्यार्थीहरुले अग्रभागमा रहेर स्वयंसेवकीय भुमिका निर्वाह गर्ने बताउनु भयो ।
देशभरका पर्यटकीय स्थलहरुमा अनेरास्ववियुले नियमित रुपमा सरसफाई कार्यक्रम समेत गर्ने उहाँले बताउनु भयो ।
उहाँले सामाजिक संजाल मार्फत नेपाल भ्रमण वर्षको व्यापक प्रचारप्रसार गर्न पनि विद्यार्थीहरुलाई निर्देशन दिनु भएको छ ।
बिहिबार महेन्द्रनगरमा आयोजित अनेरास्ववियूको अगुवा कार्यकर्ता भेलामा तामाङले अबको दुई हप्ता भित्र अनेरास्ववियूको एकताले पुर्णता पाउने समेत बताउनु भयो ।
कार्यक्रममा अनेरास्ववियूका नेताहरु सुरेन्द्र बस्नेत , सुनिता वराल , तिलकराज भण्डारी र एलवि सिंहले एकतालाई चांडै टुंगो लगाउनुपर्ने धारणा राख्नु भएको थियो ।
