गरिबी र बेरोजगारीले म्यादी प्रहरी बन्नेहरू

प्रकाशित मिति : १८ चैत्र २०७८, शुक्रबार  ८ : २७


डडेल्धुरा । चैत महिनाको टन्टलापुर घाम। यहीँ घाममा चलिरहेको छ, म्यादी प्रहरीको छनोट प्रक्रिया। ६ सय ५२ सिटका लागि जिल्लामा एक हजार सात सय ७१ जनाले आवेदन दिएका छन्। १५ गतेदेखि सुरूभएको छनोट प्रक्रिया १८ गते अर्थात् आजसम्म चलिरहेको छ।

जिल्ला प्रहरी कार्यालय डडेल्धुराको प्राङ्गडमा चलिरहेको छनोट प्रक्रियामा सयौं युवायुवतीको भीड लागिरहेको छ। यहीँ भीडमा छिन् अमरगढी नगरपालिका–८ टाँटरकी अस्मिता दमाई।

चर्को घामको परवाह नगरी भीडमा देखा परेकी दमाईको काखमा छ, सातरआठ महिनाको बच्चा । ‘घरमा आमा मात्रै हुनुहुन्छ । आर्थिक अवस्था पनि नाजुक छ । म्यादी प्रहरी भएपछि छोराछोरी पाल्न सहज होला भनेर भर्ना हुन् आएकी हु,’ उनले भनिन् ।

अल्प समयको लागि भए पनि रोजगारी पाइने र एकै पटक केही रकम पाउने आशामा युवाहरू म्यादी प्रहरीमा भर्ना हुन तम्सिएका हुन् । म्यादी हुन् युवादेखि पाका उमेरका व्यक्तिहरूले आवेदन दिएका छन् ।

कतिपय पारिवारिक अवस्था नाजुक भएका कारण म्यादी प्रहरी बन्न इच्छुक छन् भने कतिपय रहरले पनि म्यादी प्रहरी बन्न जिल्ला सदरमुकाममा पुगेका छन् । पारिवारिक अवस्था कमजोर भएकै कारण पढाइलाई निरन्तरता दिन म्यादी बन्न आएकी छन्, सावित्री टमटा।

डडेल्धुराको विकट भागेश्वर गाउँपालिका–२ रूपालबाट जिल्ला सदरमुकाम पुगेकी टमटा भन्छिन्, ‘आफू र परिवारको लागि यहाँ आएकी हुँ ।’
‘सात जनाको परिवार छ। आर्थिक अवस्था पनि नाजुक छ। म्यादी प्रहरी भइसकेपछि आउने रकमले आफू र भाइ बहिनीहरूको पढाइलाई निरन्तरता दिन सहज हुन्छ भनेर आएकी हुँ,’ उनले भनिन्, ‘घर खर्च चलाउँछु भनेर दाइ भारत त गएको छ। तर, पुग्दैन।’

कक्षा १० मा अध्ययनरत उनी म्यादी प्रहरी बनेर त्यहाँबाट आएको रकमले पढाइलाई निरन्तरता दिने सोचमा रहेको बताउँछिन्।

डडेल्धुराको भागेश्वर गाउँपालिका रूपालकै नीरज ठकुराठी ब्याचुलर पढिरहेका छन्। उनी जागिर पाइने आसमा म्यादी प्रहरी बन्न आएको बताउँछन्।

‘बेरोजगार बसेर मात्र हुँदैन काम गर्नु पर्‍यो । त्यसैले जागिर पाइने आसमा म्यादी प्रहरी बन्न आएँ,’ उनले भने, ‘म्यादी प्रहरीका लागि म अब्बल छु। निष्पक्ष रूपमा छनोट होस्।’

देशकै सेवामा जीवन बिताउने उद्देश्यले प्रहरीमा पनि आवेदन दिएको बताउँदै उनले भने, ‘भक्कर मेडिकल रिपोर्ट आएको छ। अब लिखित हुन्छ होला। त्यो भन्दा अगाडि म्यादी बनेर थप कुरा सिक्न पाउँ।’

म्यादी प्रहरी छनोट प्रक्रियामा सहभागीले निष्पक्ष रूपमा हुनु पर्ने नरेन्द्र भण्डारी बताउँछन्।

‘जिल्लामा म्यादी प्रहरीको छनोटमा राजनीतिक दलको भागबन्डा हुने गरेको हल्ला छ,’ उनले भने, ‘निष्पक्ष रूपमा छनोट गर्नुपर्छ। राजनीतिक दलका आसेपासेलाई भन्दा क्षमतावान् व्यक्तिलाई अवसर दिनु पर्छ।’


प्रतिक्रिया दिनुहोस्