पोखरा । सर्वाधिक चासोका साथ हेरिएको कास्की क्षेत्र नं २ मा अबको केहि समयमा मतगणना सुरु हुँदै छ ।
तत्कालिन पर्यटनमन्त्री रविन्द्र अधिकारीको हेलिकोप्टर दुर्घटनामा मृत्यु भएपछि रिक्त रहेको यस क्षेत्रमा प्रतिनिधिसभा सदस्य पदको लागि शनिवार निर्वाचन भएको हो ।
निर्वाचन सम्पन्न भएपछि सत्तारुढ नेकपाको उम्मेदवार विद्या भट्टराई ट्विट गर्दै सबैलाई धन्यवाद दिनु भएको छ ।
कास्की निर्वाचन क्षेत्र न. २को मतदानमा सहभागी सबै मतदाताहरुमा हार्दिक धन्यवाद । केही छिट्फुट घटनाका बाबजुद मतदान सम्पन्न गराउन सहयोग गर्नुहुने कर्मचारी सुरक्षाकर्मी, नेपाल कम्युनिस्ट पार्टीका नेता तथा कार्यकर्ता, राजनैतिक दल र पत्रकार प्रती हार्दिक आभार ब्यक्त गर्दछु ।
— Bidya Bhattarai (@Bidyabhattarai) November 30, 2019
यस्तै साझा पार्टीका अध्यक्ष रविन्द्र मिश्रले चुनावि नजिता पार्टीले स्वीकार्ने बताउनु भएको छ ।
हार्दिक आभार!
उपनिर्वाचन शान्तिपूर्ण र मतदाताको उल्लेख्य सहभागिता सहित सम्पन्न भएकोमा @Sajha_Party निर्वाचन आयोग, कर्मचारी, सुरक्षाकर्मी, मिडिया र उपनिर्वाचन क्षेत्रका मतदाता प्रति आभार प्रकट गर्दछ। सुसंस्कृत राजनीतिप्रति प्रतिवद्ध साझा पार्टी जनमतलाई पूर्ण सम्मान गर्नेछ।
— Rabindra Mishra (@RabindraMishra) November 30, 2019
यो क्षेत्रमा नेकपाकी भट्टराईसँगै कांग्रेसका खेमराज पौडेल, समाजवादी पार्टी नेपालका धर्मराज गुरूङ र साझा पार्टीकी रजनी केसी चुनावी मैदानमा हुनुहुन्छ ।
कास्की क्षेत्र नं २ का लागि ८२ वटा मतदानकेन्द्रमा भएको निर्वाचनमा ६५ प्रतिशत मतदान भएको प्रारम्भिक अनुमान रहेको जिल्ला निर्वाचन कार्यालय, कास्कीका प्रमुख महेन्द्रराज सुवेदीले जानकारी दिनुभयो ।
शहीद चोकस्थित जिल्ला समन्वय समितिको सभाभवनमा सबै मतदान केन्द्रबाट मतपेटिका आइसकेपछि आजै राति मतगणना शुरु हुने सहायक मतदान अधिकृत रामचन्द्र उपाध्यायले जानकारी दिनुभयो । सबै मतपेटिका प्राप्त हुनासाथ सर्वदलीय बैठक आह्वान गरी मतगणना शुरु गरिने उहाँले बताउनुभयो ।
उम्मेदवारको प्रतिनिधिले गणनामा कुनै पनि बाधा अवरोध पु¥याउन नपाउन् र गैरकानूनी कार्य रोक्नका लागि तारबार लगाइएको बताइएको छ । दुई स्थानबाट गणना शुरु गर्ने योजना रहेको बताइएको छ ।
