सुनसरी । बलात्कारको आरोप लागेका एक साधु पक्राउ परेका छन् ।
सिद्धबाबा भनेर चिनिने कृष्णदास गिरीलाई शुक्रबार विराटनगरबाट पक्राउ गरिएको हो ।
बलात्कार आरोपको खबर बाहिरिएसँगै आश्रम छोडेर हिँडेका उनलाई विराटनगर बाट प्रकाउ गरिएको हो ।
उनलाई जिल्ला प्रहरी कार्यालय, सुनसरीमा राखिएको छ।
गिरीमाथि कात्तिक ४ गते अनुयायी महिलालाई बलात्कार गरेको आरोप लागेको छ । महिलाले बलात्रको उजुरी दिँदा प्रहरीले नलिएको भन्दै आलोचना भएको थियो ।
महिलाले आफूलाई भेट्न बोलाएर चतरास्थित आश्रममै बलात्कार गरेको आरोप लगाएकी छन ।
प्रहरीले सिद्धबाबाकै प्रभावमा परेर जाहेरी दर्ता नगरेको पीडितले बताएपछि प्रहरीमाथि दबाब परेको थियो ।
को हुन सिद्धबाबा?
बिना अक्सिजन ९ दिनसम्म भू–समाधिमा बसेका सिद्ध बाबा सकुशल बाहिर निस्केको भन्दै चर्चा बटुलेका थिए । २०७२ चैत २६ गते पोखराको रामघाटस्थित मन्दिरमा भू-समाधिमा बसेका उनलाई ९ दिनपछि बाहिर निकालिएपछि उनको चर्चा चलेको थियो।
यो विषयले राष्ट्रिय मात्रै होइन अन्तरराष्ट्रिय चर्चा पनि बटुलेको थियो । समाधिका लागि उनी ५ फिट लम्बाइ र ३ फिट चौडाइको काठको बाकसमा ९ दिनसम्म बसेका थिए ।
आफूले आफैंलाई सिद्ध बाबा स्वघोषित गर्ने श्री १००८ श्री डा. बैश्णव कृष्णदासको वास्तविक नाम कृष्ण बहादुर गिरी हो । सोलुको जुबुमा जन्मिएका कृष्ण बहादुर गिरी उर्फ कृष्णदास जी महाराजका माता पिता, दुई भाई र दुई बहिनी छन् । उनका दुई आमा छन् ।
उनी कान्छीतिरका जेठा छोरा हुन् । नाम परिवर्तन गर्नमा खपिप्स यी बाबा पोखरा पुगेर सिद्ध बाबाको नामले चर्चा बटुलेका व्यक्ति हुन् ।
