प्रहरी नियमावली राजपत्रमा प्रकाशित, भएन १६ बर्षे पेन्सनको व्यवस्था

प्रकाशित मिति : ५ माघ २०७८, बुधबार  ९ : ३३


काठमाडौं । चासोका साथ हेरिएको संशोधित प्रहरी नियमावली सार्वजनिक भएको छ।

नेपाली सेनामा १६ बर्षे सेवा अवधीपछि पेन्सनमा घर जान जान मिल्ने व्यवस्था भएपछि पहिलोपटक प्रहरी नियमावली संशोधन भएको हो। संशोधित प्रहरी नियमावलीमा सिपाही कर्मचारीहरुले सेनाको जस्तै व्यवस्था कायम हुने आसा गरेका थिए।

यसबीचमा गृहसचिव लगायतका उच्च अधिकारीहरुले सेनामा जस्तै प्रहरीमा पनि १६ बर्षे पेन्सन अवधी कार्यान्वयनमा ल्याउने प्रतिबद्धता जनाए। तर, सरकारले सार्वजनिक गरेको संशोधित प्रहरी नियमावलीमा पुरानो व्यवस्था यथावत राखिएको छ।

सेनामा पेन्सन अवधि घटाउने व्यवस्था लागू भइसकेको सन्दर्भमा सरकारले प्रहरीमा सोही व्यवस्था लागू नगर्दा यसले सुरक्षाका अंगहरुबीच विभेद सिर्जना गरेको जानकारहरु बताउँछन्।

सेनामा भने १६ वर्षमा राजीनामा दिन पाउने व्यवस्था भएपछि प्रहरी र शसस्त्र प्रहरीमा पनि सोही व्यवस्था लागू हुनुपर्ने माग सिपाहीहरुले गर्दै आएका छन।

यता नेपाल प्रहरीका प्रवक्ता प्रहरी वरिष्ठ उपरीक्षक विष्णुकुमार केसीले प्रहरी नियमावलीको पछिल्लो संशोधनले तल्लो तहमा काम गर्ने प्रहरी कर्मचारीमा उत्प्रेरणा र नैतिक बल थपिएको दाबी गरेका छन।

प्रहरी प्रधान कार्यालयमा मङ्गलबार आयोजित पत्रकार भेटघाट एवं अन्तक्र्रिया कार्यक्रममा उनले पछिल्लोपटक प्रहरी नियमावली संशोधन गरी थप गरिएका तीन पदले २० वर्षदेखि एउटै पदमा बसेर काम गर्ने प्रहरी कर्मचारीलाई थप उर्जा मिलेको बताए।

“यसले प्रहरी कर्मचारीमा वृत्तिविकासको अवसर समानरूपमा पाउनुका साथै एउटै पदमा लामो समय बस्नुपर्ने अवस्थालाई अन्त्य गरेको छ”, केसीले भने। पद थप गर्दा प्रहरी कर्मचारीको सेवा सुविधामा भिन्नता ल्याउनुका साथै प्रहरीको मनोवल उच्च बनाएको उनको भनाइ थियो।

प्रहरीमा सहायक हवल्दार, वरिष्ठ हवल्दार र वरिष्ठ प्रहरी निरीक्षकको पद थप गरिएको हो। पाँच वर्ष काम गरेका प्रहरी जवानलाई सहायक हवल्दार, प्रहरी हवल्दारलाई वरिष्ठ प्रहरी हवल्दार र प्रहरी नायब निरीक्षकलाई वरिष्ठ प्रहरी नायब निरीक्षकमा पदोन्नति गर्ने गरी उक्त नियमावली संशोधन गरिएको हो । कार्यालय सहयोगीमा भने पाँच तह रहने गरी प्रहरी नियमावलीमा थप गरिएको प्रवक्ता केसीले बताए।

तीन तह थप गरेर प्रहरी नियमावली संशोधन गरेसँगै हाल रहेको जनशक्तिमा अब प्रहरी सहायक हवल्दारमा ३३ प्रतिशत, वरिष्ठ प्रहरी हवल्दारमा २५ प्रतिशत र वरिष्ठ प्रहरी नायब निरीक्षकमा ३३ प्रतिशत बढुवा हुने भएको छ। हाल नेपाल प्रहरीमा प्रहरी जवानमा ४७ हजार ५३, प्रहरी हवल्दारमा १४ हजार ९८९ र प्रहरी नायब निरीक्षकमा चार हजार २९६ जनशक्ति कार्यरत छन्।

प्रहरीमा यसअघि १२ वर्षसम्म एउटै पदमा बसेर अवकाशमा जाने प्रहरी नायब उपरीक्षकसम्मका प्रहरी कर्मचारीलाई अवकाश हुनुभन्दा एक महिना अगाडि नै स्वतः बढुवा दिने व्यवस्था गरिएको थियो। अब भने आठ वर्षसम्म एउटै पदमा बसेर अवकाश जाने प्रहरीलाई स्वतः एक तह बढुवा दिने व्यवस्था गरिएको छ। उक्त व्यवस्थाले प्रहरी कर्मचारीमा आत्मवल र हौसला मिलेको प्रवक्ता केसीले बताए।

यस्तो छ संशोधित प्रहरी नियमावलीको पूर्णपाठ

यो पनि पढ्नुहोस्

प्रहरीको पेन्सन १६ बर्षे बनाउन सरकार अनिइच्छुक!


प्रतिक्रिया दिनुहोस्