धर्मलाई सत्तासँग जोडेर नहेर्न उपप्रधानमन्त्री पोखरेलको आग्रह

प्रकाशित मिति : १७ कार्तिक २०७६, आइतबार  १० : ३०


काठमाडौं । उपप्रधानमन्त्री एवं रक्षामन्त्री ईश्वर पोख्रेलले धर्मलाई सत्तासंग जोडेर नहेर्न आग्रह गर्नुभएको छ ।

धापासीस्थित हरिहर मन्दिरमा आईतबार आयोजित विशेष कार्यक्रममा श्री रामचरितमानस ग्रन्थको नेपाली अनुवाद ‘श्रीरामचरितमानस “तुलसी” नेपाली छाया अनुवाद’ को लोकार्पण गर्दे उहाँले धर्म र सत्तालाई जोडेर विश्लेषण नगर्न आग्रह गर्नुभएको हो ।

सत्ताको सेवक बनेर धर्म चल्न नहुने भन्दै उहाँले समय अनुसार धर्मको परिस्कृत हुदै जानुपर्ने धारणा राख्नुभयो । तपाई कम्युनिष्टहरु धर्म मान्नुहुन्न भन्ने गरेको स्मरण गर्दे उहाँले धर्म नागरिकको आस्था र विश्वास भएकाले कम्युनिष्ट सरकार वा कसैले पनि धर्ममाथि आघात पार्ने काम गर्न नहुने बताउनुभयो ।

उहाँले भन्नुभयो “सत्ताको सेवक बनेर धर्म चल्नु हुदैन । धर्म सत्ताको सेवक बन्यो भने जनताको आस्थामा सिमित हुदैन त्यो । त्यसले पाखण्ड प्रर्दशन गर्न थाल्छ । त्यसो गर्नुहुदैन । धर्म नागरिकहरुको आस्था र विश्वास हो । कसैले पनि आस्थामा जोर जुलुम गर्नुहुदैन । 

धर्म मानिहरुको आस्था र विश्वास भएकाले आस्था र विश्वास लाई परिस्कृत गर्दै मान्दै लैजानुपर्ने हुन्छ । जोर जुलम गर्नुहुदैन । हामी कम्युष्टि पार्टीका मान्छेले धर्मलाई यसरी बुझ्छौ । ”

कार्यक्रममा नेपाल प्रज्ञा प्रतिष्ठानका उपकुलपति डाक्टर जगमान गुरुङ्गले परापुर्व कालमा पनि देवताहरुले मिलेर श्रृष्टीको शासन चलाएको दृष्टान्त दिदै धर्मशास्त्रहरुबाट सिकेर शासन सञ्चालन गर्न राजनितिक दलहरुलाई सुझाव दिनुभयो ।

उहाँले रामचरितमानस ग्रन्थ नेपालीमा अनुवाद हुनु नेपालीका लागि साह्ै खुसीको कुरा भएको बताउनुभयो । अनुवादक आचार्य श्री तुलसीराम कँडेलले नेपाली भाषामा यसअघि पनि रामचरितमानस अनुवाद भएपनि सुद्ध, छन्दबद्ध र पद्यमा नभएकाले आफुले प्रयास गरेको बताउनुभयो ।

अवधि भाषाको रामायण महाकाव्य रामचरितमानसलाई सन्तगोस्वामी तुलसीदासले १६ औ शदाब्दीमा रचना गरेका थिए । रामचरितमानस ग्रन्थको यो चौथो नेपाली अनुवाद भएपनि जस्ताको तस्तै र छन्द र पद्यका दृष्टिले यो नै पहिलो अनुवाद कृति हो । यसअघिका अनुवादमा छन्द मिलाईएको थिएन भने गद्यमा प्रकाशित छन् ।

रामचरितमानस दशरथका छोरा रामचन्द्र नायक र जनकपुर धामकी जनकनन्दनी सीतालाई नायिका बनाई रचिएको भक्ति साहित्यको आध्यात्मपरक ग्रन्थ हो । यसमा रामलाई सर्वशक्तिमान नायकको रुपमा प्रस्तुत गरिएको छ ।

यो ग्रन्थमा  आदर्श पिता, आदर्शपुत्र, आर्दश पत्नी, आदर्श भात्तृप्रेम, आदर्श गुरु भक्तिका साथै आदर्श राजधर्मको व्याख्या विश्लेषण गरिएको छ । अवधि भाषामा तुलसीलदाशद्धारा रचित श्रीरामचरितमानस सबै नेपालीहरुको पहुँचमा पुर्याउने उद्देश्यसाथ हरिहर सन्यास आश्रम देवघाटले जस्ताको त्यस्तै नेपाली अनुवादित श्री रामचरितमानस प्रकाशनमा ल्याएको हो ।

 

 

 

 

 


प्रतिक्रिया दिनुहोस्