पेट्रोलियम पदार्थको मूल्यबृद्धिविरुद्ध विप्लवद्वारा बन्दको घोषणा

प्रकाशित मिति : २५ कार्तिक २०७८, बिहिबार  १ : १५


काठमाडौं। नेत्रविक्रम चन्द ‘विप्लव’ नेतृत्वको नेकपाले पेट्रोलियम पदार्थको मूल्यवृद्धि विरुद्ध नेपाल बन्द लगायतका कार्यक्रम सार्वजनिक गरेको छ।

महासचिव विप्लवले विज्ञप्ति जारी गर्दै पेट्रोलियम तथा खाद्यबस्तु जस्ता अत्यावश्यक बस्तुमा  सरकारले निरन्तर मूल्यबृद्धि गरेको भन्दै अन्यायपूर्ण उत्पीडनलाई मुकदर्शक भएर हेरिरहँन नसक्ने बताएका छन्।

उनले सम्पूर्ण मूल्यबृद्धिका विरुद्ध सशक्त प्रतिरोध सङ्घर्षमा उत्रन पार्टीका सबै नेता कार्यकर्ता निर्देशन समेत गरेका छन।

जनभावनाको कदर गर्दै मूल्यबृद्धि तुरुन्त खारेज गर्न सरकारसँग विप्लवको अपिल छ।

विप्लवले वक्तव्यमा भनेका छन्, ‘जनताको दैनिक जीवनसँग जोडिएका पेट्रोलियम तथा खाद्यबस्तु जस्ता अत्यावश्यक बस्तुमा नेपाल सरकारले निरन्तर मूल्यबृद्धि गर्दै आएको छ र यसप्रकारको सरकारी दोहनलाई जनताले निरीहतापूर्बक पालना गर्नुपर्ने बाध्यता जस्तै बनेको तथ्य हाम्रो सामु छ। भर्खरै मात्र पनि पेट्रोल, डिजेल, मट्टितेलमा प्रतिलिटर ३ रुपैयाँ, आन्तरिक तथा बाह्य हवाई इन्धनमा प्रतिलिटर ५ रुपैयाँ र खाना पकाउने एलपी ग्यासमा ७५ रुपैयाँका हिसाबले मूल्य बृद्धि गरियो। जसअनुसार रु.४७ मा आयात गरिने पेट्रोलियम रु १३६ मा बिक्रि गरिँने छ। बिज्ञहरूले मापन गरे अनुसार सबै कर कट्टा गर्दा पनि मुनाफा सहित पेट्रोल रु.७० मा बिक्रि गर्न सकिन्छ । दैनिक रुपमा असुल गरिने यो सरकारी लुट कुन प्रयोजनमा लगानी गरिन्छ?’

विप्लवले वक्तव्य जारी गर्दै देश व्यापी विरोधदेखि नेपाल बन्दसम्मका कार्यक्रम सार्वजनिक गरेका हुन।

घोषित कार्यक्रम अनुसार आज २५ गते देशव्यापी विरोध गर्ने, २६ गते मशाल जुलुस निकाल्ने, २७ गते दिउँसो १ देखि २ बजेसम्म देशव्यापी प्रदर्शन गर्ने, २८ गते बिहान १० देखि ११ बजेसमम चक्काजाम गर्ने, २९ गतेदिउँसो सिट्ठी जुलुस र साँझ मसाल जुलुस निकाल्ने जनाइएको छ। यस्तै कात्तिक ३० गते नेपाल बन्दको कार्यक्रम राखिएको छ।

यस्तो छ विप्लवद्वारा जारी विज्ञप्तिको पूर्णपाठ


प्रतिक्रिया दिनुहोस्