सम्झौता अवधि सकिँदासम्म पनि पुल निर्माणको काम नै सुरु हुन सकेन

प्रकाशित मिति : असार ९, २०७८ बुधबार


रुकुम । सम्झौता अवधि सकिँदासम्म पनि रुकुमपूर्वमा एक मोटरेबल पुल निर्माणको काम सुरु हुनसकेको छैन  । 

पुल निर्माणको जिम्मा लिएको कम्पनीले पुल निर्माणको सम्झौता अवधि सकिँदासम्म पनि काम शुरु नगर्दा जिल्लाको सिस्ने गाउँपालिका वडा नं २, ३ र ४ का नागरिकलाई सदरमुकाम रुकुमकोट आवतजावत गर्न समस्या भएको छ ।

लामो समय बितिसक्दा पनि सानीभेरी नदीमाथि बन्नुपर्ने पुल बन्न नसक्दा सिस्ने गाउँपालिकाका २, ३ र ४ वडाका सडक सञ्जालमा सदरमुकाम रुकुमकोटसँग जोडिन सकिरहेका छैनन् । जसले गर्दा उक्त रुट भएर आउजाउ गर्ने सर्वसाधारणले सास्ती खेपिरहेका छन् ।

विसं २०७५ को असारमै पुल निर्माणको काम सक्नेगरी सम्झौता भएको थियो । तर, हालसम्म पुल निर्माणको काम अलपत्र अवस्थामा रहेको छ । विसं २०७३ असार ३१ मा हेटौँडाको मृत सञ्जीवनी निर्माण सेवाले दुई वर्षभित्र निर्माण सम्पन्न गर्ने गरी सम्झौता गरेको थियो । तर सो पुलको निर्माण कार्य भने अहिलेसम्म शुरु गरिएको छैन । कूल रु नौ करोड २० लाखको लागतमा निर्माण हुने सो पुलको निर्माण कार्य शुरु नगरेपछि सिस्ने गाउँपालिकाले ठेक्का लिएका निर्माण कम्पनीको ध्यानाकर्षण गराएको छ ।


प्रतिक्रिया दिनुहोस्