एमसीसी जस्ताकाे तस्तै पास हुन्छ: प्रधानमन्त्री देउवा

प्रकाशित मिति : ५ कार्तिक २०७८, शुक्रबार  १० : ४८


धनगढी। प्रधानमन्त्री शेरबहादुर देउवाले अमेरिकी सहयोग मिलेनियम च्यालेञ्ज कर्पोरेसन (एमसीसी) जस्ताको त्यस्तै पास गर्नुपर्ने बताएका छन्।

‘एमसीसी नेपालकै कानुनको अधिनमा रहेर लागू हुने हो,’ बाढीपहिरोको अवलोकन गर्न सुदूरपश्चिम प्रदेशको कैलाली आइपुगेका प्रधानमन्त्री देउवाले भने, ‘बाहिरी हल्ला फैलाएर त्यसको गलत प्रचार गरिएको छ, त्यस्तो हैन, एमसीसी नेपालको हितमा छ, निसर्त पास गर्नुपर्दछ ।’

देउवाले बेमौसमी वर्षापछि आएको बाढीपहिरोमा परेर भएको क्षतिलाई तत्कालै सम्बोधन गरिने बताए । अहिलेको मुख्य समस्या बाढीपहिरो रहेको बताउँदै उनले राहत र सुरक्षित बसोबासका लागि तत्कालै सरकारले कार्यक्रम ल्याउने घोषणा गरे ।

बाढीपहिरोबाट भएको क्षति र पुर्नस्थापनाका लागि दीर्घकालीन योजना बनाइने देउवाले बताए । उनले विपद जुनसुकै वेला पनि आउन सक्ने भन्दै त्यसको पूर्वतयारीमा जुट्नुपर्नेमा समेत जोड दिए ।

प्रधानमन्त्री देउवाले सुदूरपश्चिम प्रदेश सरकार परिवर्तनका बारेमा कुनै छलफल नभएको बताए । पाँचदलीय गठबन्धनको सहमतिमा सरकार बनेको प्रसंग निकाल्दै देउवाले सुदूरपश्चिमका विषयमा छलफल नभएको बताए । उनले सरकार परिवर्तनका लागि गठबन्धनसँग छलफल गरिनुपर्ने उल्लेख गरे ।


प्रतिक्रिया दिनुहोस्