‘गोली हान्न पाइँदैन, जनता मार्न पाइँदैन’ भन्दै संसदमा एमाले सांसदको नाराबाजी

प्रकाशित मिति : २५ आश्विन २०७८, सोमबार  २ : ४५


काठमाडौं। प्रतिनिधिसभाको बैठकमा ‘गोली हान्न पाइँदैन, जनता मार्न पाइँदैन’ भन्दै एमाले सांसदहरूले नाराबाजी गरिरहेका छन्।

चालू नवौँ अधिवेशनको पहिलो बैठकदेखि नै एमाले सांसदहरूले नाराबाजी गर्दै आइरहेका छन्। सोमबार पनि रोष्ट्रम अगाडि उभिएर एमाले सांसदहरूले ‘देश लुट्न पाइँदैन, गोली हान्न पाइँदैन जनता मार्न पाइँदैन’ भन्दै नाराबाजी गरिरहेका छन्।

रुपन्देहीको मोतिपुर औद्योगिक क्षेत्रमा सुरक्षाकर्मीले चलाएको गोली लागेर हिजो चार जनाको मृत्यु भएको थियो। सुकुम्बासीहरुले औधोगित क्षेत्रको जग्गामा घर टहरा बनाएपछि प्रहरीले उनीहरुलाई त्यहाँबाट हटाउन खोज्दा झडप भएको थियो।

प्रहरीको गोली लागेर चार जनाको मृत्यु भएपछि एमालेले आज संसदमा विरोध गरेको हो। नाराबाजीका बीच सभामुख अग्निप्रसाद सापकोटाले बैठकमा कार्यसूची प्रवेश गराएका छन्।

आफ्नो पार्टीले कारबाही गरेका १४ सांसदमाथि कारबाहीको सूचना टाँस नगरेको भन्दै एमाले सांसदले सभामुख सापकोटाको विरोध गर्दै आएका छन्।


प्रतिक्रिया दिनुहोस्