पूर्वमन्त्री आलमको मुद्दा ‘हेर्न नमिल्ने’मा

प्रकाशित मिति : ८ आश्विन २०७८, शुक्रबार  १२ : २५


काठमाडौं । पूर्वमन्त्री मोहम्मद आफताव आलमले दायर गरेको रिट सर्वोच्चले हेर्न नमिल्ने सूचीमा राखेको छ । सुनुवाइका लागि शुक्रबार न्यायाधीशद्वय अनिलकुमार सिन्हा र कुमार चुडालको इजलासमा सुनुवाइ हुने गरी पेसी तोकिएकोमा सो रिट निवेदन ‘हेर्न नमिल्ने’ ठहर भएको हो ।

नेपाली काँग्रेसका नेतासमेत रहेका आलमलाई थुनामै राखेर सुनुवाइ प्रक्रिया अघि बढाउने गरी तल्लो अदालतले गरेको फैसलालाई चुनौती दिँदै आलमले सर्वोच्च अदालतमा रिट निवेदन दिएका थिए ।

विष्फोटक पदार्थ बमसमेतको प्रयोग गरी ज्यान मार्ने उद्योग गरेको आरोपमा पक्राउ परेका आलमलाई तल्लो अदालतले थुनामै राखेर सुनुवाइ प्रक्रिया अघि बढाउने आदेश दिएकोमा आलमले धरौटीमा रिहा हुन माग गर्दै रिट निवेदन दिएका हुन् ।

उनको रिट निवेदनमा यसअघि पनि पटक पटक पेसी तोकिएको थियो ।


प्रतिक्रिया दिनुहोस्