तालिबानविरुद्ध सलबलियो आईएस, बुधबारको आक्रमणमा दुई तालिबानसहित तीनको मृत्यु

प्रकाशित मिति : ६ आश्विन २०७८, बुधबार  ४ : ५४


पूर्वी अफगानिस्तानको एउटा प्रहरीचौकीमा बन्दुकधारीहरुले बुधबार गरेको आक्रमणमा परी कम्तीमा दुई तालिबान लडाकू र एक सर्वसाधारणको मृत्यु भएको छ।

सुरक्षा स्रोत र प्रत्यक्षदर्शीले बताएअनुसार वर्षौंदेखि इस्लामिक स्टेट आइएस समूहले अफगानिस्तान मुख्य आधार क्षेत्र बनाउँदै आएको नान्गरहार प्रान्तको जलालाबाद शहरमा तालिबानलाई निशाना बनाएको यो पछिल्लो आक्रमण हो।

एकहप्ताको अन्तरालमा तालिबानविरुद्ध आईएसले आक्रमण गरेको यो दोस्रोपटक हो।

रिक्शामा आएका अज्ञात बन्दुकधारीहरुले जलालाबादको घावचक जिल्लाको एक चेकपोस्टमा आक्रमण गरी दुई तालिबान गार्ड र एक सर्वसाधारणको हत्या गरेको प्रत्यक्षदर्शीहरुले बताएका छन्।

यस आक्रमणको तालिबानका एक अधिकारीले पनि पुष्टि गरेका छन्। तर उनले मृतक सबै सर्वसाधारण रहेको दाबी गरेका छन्।

जिहादी समूहको स्थानीय शाखा इस्लामिक स्टेट्स खोरसानले यसै हप्ता भएको कैयौं आक्रमणको जिम्मा लिएको छ। यस आक्रमणहरुमा परी कम्तीमा दुई व्यक्तिको मृत्यु भएको पनि जनाइएको छ।

आफूले हालै नान्गरहार प्रान्तको राजधानी जलालाबादमा तालिबानलाई लक्षित गरी विस्फोट गर्दा ३५ तालिबानीको मृत्यु भएको आइएसको दाबी थियो।

यसरी आइएसले आक्रमण गर्न थालेपछि अव्यवस्थित तालिबान सरकारलाई थप चुनौती थपिएको छ। यसअघि १५ अगष्टमा जब तालिबानले राजधानी काबुल कब्जा गरेका थिए तब आईएसले अमेरिकाले अफगानिस्तान छाडेका कारण मात्र तालिबानको सत्ता फर्किएको बताएको थियो। तालिबानले लडाइले अमेरिकालाई हराएको भन्ने भनाइमा आईएस विश्वस्त छैन।

आईएस र तालिबान कसरी फरक?
‘तालिबान अफगानिस्तानको सबैभन्दा महत्त्वपूर्ण खेलाडी हो। आईएस आफ्नो सञ्जाल पुनः निर्माण गर्न प्रयासरत अन्तर्राष्ट्रिय जिहादी समूह हो। तर यो अलकायदा र तालिबान दुवैको घातक दुस्मन हो’ न्युयोर्कस्थित सोपान सेन्टरका सुरक्षा विश्लेषक कोलिन क्लर्क भन्छन्।

तालिबान सन् १९८० को अन्त्यतिर अफगानिस्तानमा सोभियत सङ्घको आक्रमणविरुद्ध प्रतिकार र सन् १९९० को सुरुतिर अफगानिस्तानमा देखिएको आन्तरिक द्वन्द्वसँगै उदय भएको हो।

आईएस त्यसको वर्षौँपछि सन् २००३ मा अमेरिकाले इराकमाथि आक्रमण गरेपछि अलकायदाको स्थानीय शाखाको अवशेषहरूबाट विस्तार भएर बनेको समूह हो।

सन् २००७ मा इराकमा अमेरिकी फौज थपिएपछि निकै वर्षसम्म हराएको यो समूह सन् २०११ पछि फेरि देखिन थाल्यो।

तालिबानको चासो अफगानिस्तानमा मात्रै सीमित रहे पनि आईएसको विश्वव्यापी आकाङ्क्षा छ।

वासिङ्टनस्थित जर्जटाउन विश्वविद्यालयका मध्यएसिया आतङ्कवाद विज्ञ ड्यानियल बाइमन तालिबान विगतको आदर्श मुस्लिम देशमा अफगानिस्तानलाई फर्काउन चाहने बताउँछन्। आईएसको चाहना विश्व नै मुस्लिम राज्य बनाउने रहेको छ। एएफपी र बीबीसीको सहयोगमा


प्रतिक्रिया दिनुहोस्