कक्षा १२ को परीक्षा भौतिक उपस्थितीमै सुरु

प्रकाशित मिति : ३० भाद्र २०७८, बुधबार  २ : ५७


काठमाडौं । कक्षा १२ को परीक्षा भौतिक उपस्थितीमै शुरु भएको छ।

कोरोना भाइरसको जोखिमका कारण दुई पटक स्थगित भइसकेको कक्षा १२ को परीक्षा राष्ट्रिय परीक्षा बोर्डले विद्यार्थीहरुको भौतिक उपस्थितीमै आज (बुधबार) बिहान ११ बजेबाट शुरु भएको हो।

देशभर ४ हजार ३१५ वटा परीक्षा केन्द्रमा सञ्चालन भइरहेको परीक्षा असोज ८ गतेसम्म चल्नेछ।

परीक्षामा सहभागी सम्पूर्ण विद्यार्थीहरुलाई स्वास्थ्यका मापदण्डहरुको पूर्ण पालना गराएर मात्रै कक्षाकोठामा प्रवेश गर्न दिइएको रत्नराज्य क्याम्पसका निमित्त प्रधानाध्यापक रामाशीष यादवले बताए।

उनले हरेक विद्यार्थीहरुलाई तीन मिटरको दूरी कायम गराएर परीक्षा सञ्चालन गराइएको बताए।

नि. प्रधानाध्यापक यादवले भने, ‘लामो समयदेखि जाँच रोकिएको थियो, राज्यले जाँच लिनुपर्ने, राज्यले विद्यार्थीको भविष्यमाथि खेलवाड नहुने दृष्टिकोणले नियम बनायो, त्यो नियम पालना गर्ने क्रममा हामीले विद्यार्थीको भौतिक उपस्थिती नै कायम गराएर दुई दिन पहिलादेखि प्रत्येक रुमलाई स्यानिटाइजर गर्यौं, आज विहान पनि स्यानिटाइजर गर्यौं, विद्यार्थीहरुलाई ज्वरो आएका छ कि छैन जाँच गरेर, मास्कको व्यवस्था गरेर, हरेक विद्यार्थीलाइ साढे तीन फिटको डिस्टेन्स राखेर परीक्षा लिएका छौँ ।’

त्यस्तै विजय स्मारक माध्यामिक विद्यालयका प्रधानाध्यापक डिल्लीप्रशाद शर्माले हरेक विद्यार्थीहरुको ज्वरोको परीक्षण गरेर मात्रै कक्षाकोठामा प्रवेश गराइएको बताए। उनले कोरोनाको जोखिमबाट बच्नका लागि प्रत्येक विद्यार्थीहरुलाई मास्क र स्यानिटाइजर अनिवार्य गरेको बताए।

उनले भने, ‘कोभिड महामारीको जोखिमलाई ध्यानमा राखेर स्वास्थ्यको मापदण्ड अपनाएका छौं, गेटमै मास्क अनिवार्य गरेका छौँ,परीक्षाका लागि गेटमा जानुअघि थर्मल गन प्रयोग गरेर ज्वरो नाप्छौँ,ज्वरो आएका विद्यार्थीहरुका लागि पीसीआरबाट पोजेटिभ देखिएको सर्टिफिकेट ल्याएपनि नल्याएपनि उनीहरुमा ज्वरो देखियो भने हामी छुट्टै कक्षाकोठाको व्यवस्था गरेका छौँ।’

कोरोना भाइरसको जोखिमका कारण जेठ २६ देखि असार ४ र साउन ३१ देखि भदौ ९ गतेसम्म दुई पटक कक्षा १२ को परीक्षा स्थागित भएको थियो।

आजबाट देशभरका करिव पौने ४ लाख विद्यार्थीहरुले परीक्षा दिन लागेको राष्ट्रिय परीक्षा बोर्डले जनाएको छ।


प्रतिक्रिया दिनुहोस्