महिला प्रदर्शनको समाचार लेख्ने पत्रकारलाई तालिवानले कुटे

प्रकाशित मिति : २४ भाद्र २०७८, बिहिबार  ३ : ०१


काबुल । अफगानिस्तानको राजधानी काबुलमा महिला प्रदर्शनबारे समाचार लेख्ने पत्रकारलाई तालिवानले निर्घात कुटेका छन् । तालिवान सत्ताबारे अन्तर्राष्ट्रिय समुदायको चासो बढिरहेका बेला महिला प्रदर्शनको समाचार लेख्ने पत्रकारले कुटाइ खाएका हुन् ।

सामाजिक सञ्जाल ट्विटरमा राखिएका विभिन्न तस्विरमा तालिवानले पत्रकारलाई लट्टीले हिर्काएको देखिन्छ । ती पत्रकारको अनुहार र शरीरका विभिन्न भागमा निलडाम देख्न सकिन्छ । महिलाबारे समाचार लेखेका दुई पत्रकारलाई बाहिरी बस्त्र खोल्न लगाएर तालिवानले निर्मम ढंगले कुटेका छन् । कुटाइका कारण उनीहरुको पिठ्युँ, ढाड र कम्मर रातो देखिन्छ । अर्को एक भिडियोमा तीन पत्रकारलाई सामूहिक रुपमा बाँधेर एउटा कोठामा लगिएको देखिन्छ । उनीहरुको अनुहारमा चोट र निलो डाम देखिन्छ ।

आफूलाई सरकारमा सहभागी नगराएको र विभिन्न अधिकार कटौती गरेको भन्दै काबुलमा महिलाले प्रदर्शन गर्दै आएका छन् । प्रदर्शनबारे समाचार लेख्न तालिवानले सञ्चारकर्मीलाई उर्दी दिएका छन् ।


प्रतिक्रिया दिनुहोस्