यू-२३ फुटबल टोलीको प्रशिक्षकमा बालगोपाल महर्जन नियुक्त

प्रकाशित मिति : २१ भाद्र २०७८, सोमबार  ७ : ३३


काठमाडौं । बालगोपाल महर्जन नेपाल यू-२३ पुरुष फुटबल टोलीको प्रशिक्षक नियुक्त भएका छन्।

अखिल नेपाल फुटबल संघ (एन्फा)ले सोमबार राष्ट्रिय फुटबल टोलीका पूर्व मुख्य प्रशिक्षकसमेत रहेका बालगोपाल महर्जनलाई नेपाल यू-२३ टोलीको प्रशिक्षकको जिम्मेवारी दिएको हो।

यसअघि बालगोपालको प्रशिक्षणमा नेपालले घरेलु मैदानमा भएको थ्री नेसन्स कपको उपाधि हात पारेको थियो।

यस्तै, बालगोपालकै प्रशिक्षणमा नेपाल यू-२३ टोलीले घरेलु मैदानमा भएको १३औँ दक्षिण एसियाली खेलकुद प्रतियोगिता ९साग०मा स्वर्ण पदक हासिल गरेको थियो।

बालगोपालले टोलीलाई एएफसी यू-२३ एसिया कप छनोटका लागि प्रशिक्षण गराउनेछन्। मुख्य प्रशिक्षकमा बालगोपाल रहँदा सहायक प्रशिक्षकमा सुजित केसी रहेनछन्। यस्तै, गोलरक्षक प्रशिक्षकमा ललित चन्द रहनेछन्।

समूह ‘बी’मा रहेको नेपालले इरान, लेबनान र ताजकिस्तानको सामना गर्नेछ।

नेपालले पहिलो खेल २५ अक्टोबरमा इरानसँग खेल्दा २८ अक्टोबरमा आयोजक ताजकिस्तानसँग खेल्नेछ। यस्तै, ३१ अक्टोबरमा लेबनानसँग खेल्ने कार्यक्रम रहेको छ।


प्रतिक्रिया दिनुहोस्