भारतमा रहस्यमयी रोगका कारण ५० जनाको मृत्यु, फैलियो त्रास

प्रकाशित मिति : १६ भाद्र २०७८, बुधबार  ३ : ५०


भारतमा अज्ञात रोगका कारण कम्तिमा ५० जनाको मृत्यु भएको छ भने उक्त पत्ता लाग्न नसकेको रोगबाट सयभन्दा बढी विरामी अस्पताल भर्ना भएका छन्। बीबीसीका अनुसार भारतीय राज्य उत्तर प्रदेशका केही जिल्लामा एक साताभन्दा बढी समयदेखि बालबालिकाहरू उच्च ज्वरो आउने र पसिनामा भिजेर बिउँझिने समस्याबाट पीडित छन्।

तीमध्ये धेरै जनामा जोर्नी दुख्ने, टाउको दुख्ने, शरीरमा पानी कम हुने र रिँगटा लाग्ने लक्षण देखिएको छ। केहीको भने हातखुट्टामा डाबर आएको पाइन्छ। मृत्यु भएका कसैलाई पनि कोरोनाको संक्रमण नभएको बताइएको छ।

कोरोनाभाइरसको घातक दोस्रो लहरबाट भारत बिस्तारै मुक्त हुँदै गरेको समयमा उत्तर प्रदेशमा भएको मृत्युलाई सञ्चारमाध्यमहरूले अज्ञात ज्वरोले भारतको सबैभन्दा सघन बस्ती भएको राज्यका गाउँहरूलाई आक्रान्त पारेको रूपमा प्रस्तुत गरेका छन्।

आगरा, मथुरा, मैनपुरी, एटा, कासगन्ज र फिरोजाबादका चिकित्सकहरू मृत्युको मूल कारण लामखुट्टेबाट सर्ने भाइरसको सङ्क्रमण डेङ्गी भएको विश्वास गर्छन्। उनीहरूका अनुसार धेरै बिरामीहरू रगत जमाउन सहयोग गर्ने एक प्रकारको रक्त कोष प्लेट्लेटको सङ्ख्या कम हुने अवस्थामा भर्ना गरिएको बताउँछन्। यो लक्षण डेङ्गीमा गम्भीर बिरामीहरूमा देखिन्छ।

‘अस्पताल आएका बिरामीहरू विशेषगरी बालबालिकाहरूको निकै छिटो मृत्यु भइरहेको छ’ फिरोजाबाद जिल्लाका वरिष्ठतम चिकित्सक डा. नीता कुलश्रेष्ठ भन्छिन्। फिरोजाबादमा गत साता ३२ बालबालिकासहित ४० जनाको यही समस्याका कारण निधन भएको थियो।

पोथी लामखुट्टेले सार्ने उष्णप्रदेशीय रोग डेङ्गी भारतका सयौँ वर्षदेखि छ। विश्वभरि १०० देशमा देखिने यो रोगका ७० प्रतिशत बिरामी एशियामा हुन्छन्। डेङ्गीका चार भाइरस छन् र दोस्रो पटक सङ्क्रमण हुँदा बालबालिकाको मृत्यु हुने सम्भावना वयस्कमा भन्दा पाँचगुना बढी हुन्छ।

डेङ्गी सार्ने लामखुट्टेले घर वरपर सफा पानीमा प्रजनन गर्छ। ‘मानिसले यो लामखुट्टेको प्रजनन स्थान बनाउँछन् र मान्छेले मात्रै त्यसलाई कम गर्न सक्छन्’ लामखुट्टेबाट सर्ने भाइरसविज्ञ डा. स्कट हाल्स्टीड भन्छन्। प्रत्येक वर्ष विश्वभरि डेङ्गीबाट १० करोड मानिस गम्भीर बिरामी पर्छन्। तर भारतको उत्तर प्रदेशमा देखिएको ज्वरोसम्बन्धी मृत्युको कारण डेङ्गी भए नभएको स्पष्ट छैन।


प्रतिक्रिया दिनुहोस्