चारखुट्टे उभयचर ह्वेलको अवशेष भेटियो!

प्रकाशित मिति : १४ भाद्र २०७८, सोमबार  २ : ०४


इजिप्टका वैज्ञानिकहरूले चार करोड ३० लाख वर्षअगाडि अस्तित्वमा रहेको चारखुट्टे ह्वेलको एउटा नयाँ प्रजाति पहिचान गरेका छन्।

वैज्ञानिक नाम ‘फिओमिसेटुस अन्युबिस’ दिइएको उक्त ह्वेल उभयचर थियो अर्थात् जल र भूमि दुवै ठाउँमा विचरण गर्थ्यो। उक्त ह्वेलको जीवावशेष इजिप्टको वेस्टर्न डिजर्टमा फेला परेको बीबीसीले जनाएको छ।

उक्त ह्वेलको खप्पर प्राचीन इजिप्टमा मृत्युका देवताका रूपमा पूजित स्यालको टाउको भएका अन्युबिससँग मिल्दोजुल्दो छ। त्यसैले यो प्रजातिको वैज्ञानिक नाम तिनै मृत्युदेवको नाममा राखिएको छ।

आधुनिक ह्वेलका पुर्खाहरू भूमिमा बस्ने मृगजस्ता स्तनपायी जीवबाट एक करोड वर्षको अवधिमा विकसित भएका हुन्। फिओमिसेटुस अन्युविसको तौल झन्डै ६०० केजी र लम्बाइ तीन मिटर भएको र सिकार समात्न आवश्यक पर्ने भएकाले त्यसको च्यापु बलियो भएको प्रोसीडिङ्स अफ द रोयल सोसाइटीमा प्रकाशित शोधमा उल्लेख छ।

चारवटा खुट्टा भएको उक्त ह्वेल जमिनमा हिँड्न र पानीमा पौडिन सक्थ्यो। इजिप्टको फायुम डिप्रेशनमा फेला परेको आंशिक अस्थिपञ्जरको मन्सूरा विश्वविद्यालयमा विश्लेषण गरिएको थियो।

त्यो क्षेत्रमा अहिले मरुभूमि भए पनि पहिला समुद्र थियो। त्यहाँ धेरै जीवावशेष फेला पर्ने गरेको छ। खुट्टा भएका ह्वेल फेला परेको यो पहिलो पटक होइन। तथापि फियोमिसेटुस अन्युबिस अफ्रिकामा फेला परेको प्रारम्भिक किसिमसको अर्धजलचर ह्वेल भएको विश्वास गरिएको छ।


प्रतिक्रिया दिनुहोस्