गठबन्धन बैठकः मन्त्रिपरिषदलाई चाँडै पूर्णता दिने सहमति, दार्चुला प्रकरणबारे प्रधानमन्त्रीलाई प्रश्न

प्रकाशित मिति : १४ भाद्र २०७८, सोमबार  १२ : १८


सत्ता गठबन्धन नेपाली काँग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी नेपाल र राष्ट्रिय जनमोर्चाका शीर्ष नेताबीच सरकारलाई चाँडोभन्दा चाँडो पूर्णता दिने सहमति भएको छ।

प्रधानमन्त्री एवं नेपाली काँग्रेसका सभापति शेरबहादुर देउवाको संयोजकत्वमा प्रधानमन्त्री निवास बालुवाटारमा आज बसेको गठबन्धनका शीर्ष नेताको बैठकमा सो सहमति भएको हो। बैठकमा समसामयिक राजनीतिक विषयको समीक्षा, मूल्याङ्कन हुनुका साथै गठनबन्धनका शीर्ष नेताहरुले सरकार सञ्चालन सम्बन्धमा प्रधानमन्त्री देउवालाई सुझाव दिएको काँग्रेस महामन्त्री पूर्णबहादुर खड्काले जानकारी दिए।

बैठकमा काँग्रेसका तर्फबाट प्रधानमन्त्री देउवा, वरिष्ठ नेता रामचन्द्र पौडेल, महामन्त्री खड्का, नेता कृष्णप्रसाद सिटौला, माओवादी केन्द्रका अध्यक्ष पुष्पकमल दाहाल ‘प्रचण्ड’, नेता नारायणकाजी श्रेष्ठ, एकीकृत समाजवादीका अध्यक्ष माधवकुमार नेपाल, जसपा केन्द्रीय परिषद् अध्यक्ष डा बाबुराम भट्टराई र अध्यक्ष उपेन्द्र यादवलगायत नेताहरु सहभागी थिए।

सो क्रममा प्रधानमन्त्री शेरबहादुर देउवालाई सत्ता गठबन्धनका नेताहरुले दार्चुलाका जयसिंह धामी बेपत्ता प्रकरणमा सरकारको अडान प्रष्ट पार्न आग्रह गरेका थिए। गत साउन १५ मा भारतीय एसएसबीले तुइन काट्दा धामी बेपत्ता भएको स्थानीयको भनाइ छ। सोमबार बसेको बैठकमा जनता समाजवादी पार्टी जसपा संघीय परिषद्का अध्यक्ष डा. बाबुराम भट्टराई, माओवादी केन्द्रका नेता नारायणकाजी श्रेष्ठ लगायतले छानविन समितिको प्रतिवेदन आउन ढिलाइ भएकोमा असन्तुष्टि जनाएका थिए।

उनीहरुले तत्काल प्रतिवेदन ल्याउनुपर्ने र सरकारको अडान प्रष्ट भएपछि त्यसका आधारमा भारतसँग वार्ता गनुपर्छ भन्दै दबाब दिएका थिए। घटनाबारे छानविन गर्न भन्दै सरकारले गृह मन्त्रालयका सहसचिवको नेतृत्वमा समिति बनाएको छ। तर अहिलेसम्म समितिले प्रतिवेदन तयार नपारेपछि चौतर्फी प्रश्न उठिरहेको छ। प्रमुख प्रतिपक्षी दल नेकपा एमालेका सांसदहरुले बारम्बार दोहोर्याउँदै वर्तमान सरकार भारतसँग किन छलफल गर्न सकिरहेको छैन भनेर प्रश्न गरिरहेका छन्।


प्रतिक्रिया दिनुहोस्