सिन्धुपाल्चोकको मेलम्चीमा फेरि बाढी, प्रहरी चौकी अन्यत्र सारियो

प्रकाशित मिति : १७ श्रावण २०७८, आइतबार  ६ : ५०


सिन्धुपाल्चोकको मेलम्चीमा गएराति फेरि बाढी आएको छ । सिन्धुपाल्चोकको मेलम्ची खोलामा पानीको सतह बढेपछि बजार क्षेत्रका बासिन्दालाई सतर्क रहन आग्रह गरिएको छ।

शनिबार रातिदेखि भारी वर्षा भइरहेकोले मेलम्ची खोला र इन्द्रावती नदीको बहाव बढ्दो क्रममा रहेको छ। बहाव एक्कासी बढेपछि साइरन बजाएर तटीय क्षेत्रका बासिन्दालाई सचेत गराइएको छ।

स्थानीय बासिन्दाका अनुसार तिम्बुमाथि ठूलो पहिरो गएर असार १ गतेजस्तै खोलाले काठ र लेदो बगाएर ल्याएको थियो। यस्तै, बाढीले भत्किएको इन्द्रावती पुलको आधा टुक्रा बगाए ५०/६० मिटर तल ल्याइपुर्‍याएको छ।

बाढीले केही घरमा क्षति पुर्‍याएको छ भने तालामाराङको प्रहरी चौकी विस्थापित भएको छ ।

जिल्ला प्रहरी कार्यालय सिन्धुपाल्चोकका अनुसार लेदो माटोसहितको बाढीले केही घरमा क्षति पुगेको र केही घरमा पानी पसेको छ। तालामाराङ प्रहरी चौकीमा बाढीको पानी पसेपछि नजिकैको अर्को भवनमा सरेको छ।

हेलम्बु गाउँपालिका–१ हेमाथाङ्का चौरमा पहिरो गएर केहीबेर थुनिएपछि बाढी आएको अनुमान गरिएको प्रहरीले बताएको छ । चनौटे बजारको बीच भागबाटै पानी बगेको छ ।

यसअघि असार १ गते आएको बाढीले पनि हेलम्बु र मेलम्ची लगायतमा ठूलो क्षति पु¥याएको थियो । बाढीका कारण ५ जनाको मृत्यु भएको थियो भने १५ जना अझै बेपत्ता छन् ।


प्रतिक्रिया दिनुहोस्