जसपा विवादमा बहस टुंग्याउने आयोगको तयारी, आजै आदेश आउन सक्ने

प्रकाशित मिति : ७ श्रावण २०७८, बिहिबार  ७ : ५५


काठमाडौं। जनता समाजवादी पार्टी (जसपा)भित्रको विवाद समाधान गर्न गठित निर्वाचन आयोगको इजलास आज बस्दै छ। आयोगले आज दुवै पक्षको बहस टुंग्याउने तयारी गरेको छ।

यसअघि आइतबार बहस गर्दै आयोगले जसपाको दुवै पक्षलाई आधिकारिक कागजात बुझाउन भनेको थियो। दुवै पक्षले बुझाएको प्रमाण तथा जसपाको केन्द्रीय कार्यकारिणी समितिको बहुमत, अल्पमत हेरेर निर्णय लिइने आयोगले जनाएको छ।

आयोगको कानुन महाशाखाका अनुसार दुवै पक्षले बुझाएको सक्कल कागजातकै भरमा फैसला लिन आयोगलाई कठिनाइ परेको छ। बैठकको तरिका र कागजातमा दुवै पक्षबाट आ–आफ्नो दाबी गरिए पनि पार्टीको विधिअनुसार दुवैको प्रक्रिया मिलेको नदेखिएको आयोग स्रोतले जनाएको छ।

जसपामा केन्दीय कार्यकारिणी समितिलाई लिएर पनि विवाद छ। दुई अध्यक्ष महन्थ ठाकुर र उपेन्द्र यादवले अलग अलग समिति दाबी गरिरहेका छन्।

आज हुने सुनुवाइपछि आयोगको इजलासले आधिकारिक केन्द्रीय कार्यकारिणी समिति कुन हो त्यसबारे निर्णय दिन सक्ने बताइएको छ। त्यसपछि तीन/चारदिनको समय दिएर समितिमा रहेकालाई आयोगमा उपस्थित गराएर हेड काउन्ट गर्ने तयारी छ।

दुवै पक्षका तीन/तीन जना कानुन व्यवसायीलाई आयोगले बहसका लागि बढीमा दुई/दुई घण्टाको समय निर्धारण गरेको छ। आयोगले दुवै पक्षको कुरा सुनेर आजै केही आदेश आउन सक्ने बताइएको छ। जसपा दर्ताको बेला ५१ सदस्यीय कार्यकारिणी समिति आयोगको अभिलेखमा छ। पछि अध्यक्ष महन्थ ठाकुरले २० जना कार्यकारिणी सदस्य थप गरेका थिए।

राजनीतिक दलसम्बन्धी ऐनमा लिखित जवाफ र प्रमाणको आधारमा कुनै पक्षलाई मान्यता दिने अवस्था नरहे केन्द्रीय समितिमा बहुमत रहेको पक्षलाई दलको आधिकारिकता दिने प्रावधान छ।

आयोगले जसपा विवादबारे टुंगो लगाउन प्रमुख आयुक्त दिनेश थपलियाको नेतृत्वमा पाँच सदस्यीय इजलास गठन गरेको थियो।

प्रधानमन्त्री शेरबहादुर देउवालाई जसपाका दुवै पक्षले विश्वासको मत दिएपनि पार्टीभित्रको आन्तरिक एकता भने धरापमा परेको छ। आयोगबाट आधिकारिकता नपाउने पक्षले नयाँ पार्टी गठन गर्नुपर्नेछ। महन्थ ठाकुर पक्षले आधिकारिकता पाएन भने पुरानै पार्टी राजपा नाम समेत नपाउने भएको छ। किनकी, उपेन्द्र यादव पक्षका नेताले आयोगमा राजपा नामको दल दर्ता गरिसकेका छन्।


प्रतिक्रिया दिनुहोस्