फेसबुक र इस्टाग्राममा ‘लाइक’को सङ्ख्या लुकाउन पाउने

प्रकाशित मिति : असार ५, २०७८ शनिबार


काठमाडौं । सामाजिक संजलामा मानिसहरुको प्रभावकारिता र लोकप्रियताको संकेतकका रुपमा लिइँदै आएको ‘लाइक’ को सङ्ख्या लुकाउन पाइने भएको छ ।

फेसबुक र इस्टाग्रामले सबै प्रयोगकर्ताहरुका लागि नयाँ विकल्प ल्याउन लागेको हो । जसमा प्रयोगकर्ताले आफ्ना पोस्टमा आउने ‘लाइक’ को सङ्ख्या लुकाउन पाउनेछन् ।

पछिल्लो समय लाइकलाई सामाजिक संजाल प्लेटफर्ममा प्रभावकारिता र लोकप्रियताको मापकको रुपमा लिइँदै आएको छ । फेसबुक र इन्स्टाग्रामलाई कम तनावयुक्त बनाउनका लागि कम्पनीले यस्तो उपाय अपनाउन लागेको हो ।

यसका लागि कम्पनीले २०१९ मै विविध परीक्षणहरु गराएको थियो । सबै प्रयोगकर्ताहरुले आफ्नो पोस्टमा आउने लाइकको सङ्ख्या अरुलाई देखाउने या नदेखाउने भनेर छनोट गर्न पाउने छन् भने अरुको पोस्टमा आएको लाइक हेर्ने या नहेर्ने भनेर पनि निर्णय लिन सकिने विकल्प समेत राखिएको छ ।

प्रयोगकर्ता र समाजका लागि फेसबुकको प्लेटफर्म मानसिक रुपमा हानिकारक हुन सक्नेबारे लामो समयदेखि विवादकाबीच अब प्रयोगमा आउने भनिएको यो नयाँ फिचरलाई अनिवार्यभन्दा पनि वैकल्पिक राखिएको छ ।

कति प्रयोगकर्ताले यसलाई रुचाउनेछन् भन्ने स्पष्ट भइसकेको छैन । फेसबुकले भनेको छ, “लाइकको सङ्ख्या नदेखिनु कति मानिसका लागि लाभदायक साबित भएको छ भने कति चाहिँ यसबाट निराश भएको पनि पाइएको छ । विशेषगरी लाइकको सङ्ख्याले हालको ट्रेन्ड या के पपुलर छ भन्ने देखाउने हुनाले नै मानिसलाई यो फिचर अपनाउन अनिवार्य नगरि विकल्प मात्र दिइएको हो ।”

मानिसले यदि आफ्नो पोस्टमा आउने लाइक सार्वजानिक गरे भने त्यसमा ककसले लाइक गरेका छन् भनेर सूची देखाउनेछ तर सङ्ख्याबारे खुलासा गर्नेछैन । पोस्ट गर्ने प्रयोगकर्ताले चाहिँ आफूले प्राप्त गरेको लाइकको सङ्ख्या हेर्न पाउनेछन् ।

कम्पनीका अनुसार यो फिचरले मानिसलाई तस्बिर या भिडियोहरु शेयर गर्नतर्फ केन्द्रित गराउनेछ र कति लाइक आउँछ भन्नेबाट ध्यान हटाउन मद्दत गर्ने अपेक्षा गरिएको छ ।


प्रतिक्रिया दिनुहोस्