गृहमन्त्री थापालाई भोट नदिएकोमा अष्टलक्ष्मीसहित एमालेका १४ सांसदलाई स्पष्टीकरण

प्रकाशित मिति : असार ९, २०७८ बुधबार


काठमाडौं । बागमतीका मुख्यमन्त्री डोरमणी पौडेलले अष्टलक्ष्मी शाक्यसहित माधव नेपाल पक्षीय १४ जना सांसदलाई स्पष्टीकरण सोधेका छन्।

राष्ट्यिसभा सदस्यको उपनिर्वाचनमा एमालेका उम्मेद्वार रामबहादुर थापा बादल पराजित भएका थिए।

आफ्नै पार्टीका उम्मेदवारको पक्षमा मतदान नगरेको भन्दै एमालेले आफ्ना सांसदहरुलाई स्पष्टीकरण सोधेको हो।

एमाले वाग्मती प्रदेशसभाको संसदीय बोर्डले १४ प्रदेशसभा सदस्यलाई कारवाहीको प्रक्रिया अगाडि बढाएको हो।

राष्ट्रियसभाको उपनिर्वाचनमा पार्टीको आधिकारिक उम्मेदवारप्रति अन्तरघात गरेको, आफ्नै पार्टीको सरकारविरुद्ध निरन्तर लागेको, अविश्वासको प्रस्ताव दर्ता गरेको, अलग्गै संसदीय दल गठन गरेको, समानान्तर गतिविधि सञ्चालन गरेकोलगायतका आरोप लगाएर प्रदेशसभा सदस्यलाई संसदीय दलको विधानको दफा २५, उपदफा ३ देहाय (क, ख, ग, घ र ङ) अनुसार अनुशासन उल्लङ्घन गरेको भनी स्पष्टीकरण सोध्ने निर्णय गरिएको नेकपा एमाले वाग्मती प्रदेश संसदीय दलका मुख्य सचेतक दीपक निरौलाले जानकारी दिए।

उनका अनुसार बोर्ड बैठकले प्रदेशसभा सदस्य अष्टलक्ष्मी शाक्य, राजेन्द्र पाण्डे, अरुणप्रसाद नेपाल, बसुन्धरा हुमागाईं, लक्ष्मण लम्साल, मुनु सिग्देल, कुसुम कार्की, मीना ज्ञवाली, शान्तिप्रसाद पौडेल, रचना खड्का, कृष्ण खनाल, वसन्त मानन्धर, इन्द्रमाया गुरुङ र पार्वती सिलवाललाई स्पष्टीकरण सोध्ने निर्णय गरेको छ ।


प्रतिक्रिया दिनुहोस्