विप्लवका तर्फबाट पनि २ सदस्यीय वार्ता टोली गठन

प्रकाशित मिति : १८ फाल्गुन २०७७, मंगलबार  ३ : ०१


काठमाडौं । नेत्रबिक्रम चन्द (विप्लव) नेतृत्वको प्रतिबन्धित नेपाल कम्युनिस्ट पार्टीले पनि सरकारसँग वार्ताका लागि वार्ता टोली गठन गरेको छ ।

विप्लव नेतृत्वको नेकपाले खड्गबहादुर विश्वकर्मा (प्रकाण्ड)को नेतृत्वमा २ सदस्यीय वार्ता टोली गठन गरेको हो । वार्ता टोलीको सदस्यमा प्रतिबन्धित नेकपाका केन्द्रीय सदस्य उदयबहादुर चलाउने (दीपक) छन् ।

प्रतिबन्धित नेकपाका महासचिव विप्लवले एक विज्ञत्पीमार्फत वार्ता टोली गठन गरिएको बताएका छन् ।

विप्पवले देशका राजनीतिक, आर्थिक र राष्ट्रिय स्वाधिनताका विषयमा सरकारसँग वार्तामा बस्न आफ्नो पार्टी सहमत भएको बताएका छन् ।

सरकारले पनि बिहीबार गृहमन्त्री रामबहादुर थापा बादलको नेतृत्वमा २ सदस्यीय वार्ता टोली गठन गरेको छ ।

वार्ता टोलीमा प्रधानमन्त्री केपी शर्मा ओलीका परराष्ट्र सल्लाहकार राजन भट्टराई सदस्य छन् । वार्ताद्वारा नै सबै समस्या समाधान गर्ने गरी वार्ता टोली गठन भएको मन्त्री गुरुङले जानकारी दिए ।

केही समय अगाडिदेखि नै सरकारी पक्ष र प्रतिबन्धित विप्लव समूहबीच अनौपचारिक वार्ता हुँदै आएको थियो । अनौपचारिक वार्ता सकारात्मक भएपछि औपचारिक वार्ताको वातावरण बनेको सरकारी स्रोतको भनाइ छ ।

प्रतिबन्धित नेकपाका महासचिव विप्लवले केही दिन अगाडि एक वक्तव्य जारी गर्दै आफूहरुमाथि लगाइएको प्रतिबन्ध हटाइए सरकारसँग वार्ता हुने बताएका थिए ।

तर, सरकारले भने वार्ताकै क्रममा सबै मागहरुको सम्बोधन हुने बताएको छ । सरकारका प्रवक्ता गुरुङले सबै कुरा वार्ताद्वारा नै टुंगिने बताए ।

‘उहाँहरुका नेता-कार्यकर्तामाथि लागेका मुद्दा, हतियारको विषय सबै कुरा टुंगो लागेको छ,’ गुरुङले भने, ‘वार्ता अगाडि नै सबै कुराको समाधान गरेर त्यसको औचित्य हुँदैन ।’


प्रतिक्रिया दिनुहोस्