काठमाडौंको कोटेश्वर चोकबाट १ राउण्ड गोलीसहित पेस्तोल बरामद

प्रकाशित मिति : १९ पुस २०७७, आइतबार  ११ : ०७


काठमाडौं । प्रहरीले काठमाडौंको कोटेश्वरबाट एउटा पेस्तोल बरामद गरेको छ । बाटोमा हिँडिरहेका सर्वसाधारणले दिएको सूचनाका आधारमा प्रहरीले कोटेश्वर चोक नजिकबाट पेस्तोल बरामद गरेको हो ।

बाटो (फूटपाथ)मा हिँडिरहेका व्यक्तिले पेस्तो देखेपछि प्रहरीलाई खबर गरेका थिए । स्थानीयको सूचनाका आधारमा महानगरीय प्रहरी प्रभाग कोटेश्वरबाट खटिएको प्रहरीले पेस्तोल बरामद गरेको हो ।

एक राउण्ड गोल समेत रहेको पेस्तोल कसको हो भन्ने विषय भने खुलेको छैन । प्रहरीका अनुसार एक युवकले कोटेश्वरमा पेस्तोल देखाएर आफूलाई लुटपाट गर्न खोजिएको प्रहरीलाई बताएका छन् ।

आफूलाई पेस्तोल देखाएर लुट्न खोजिएको भन्ने युवक हुन् सिन्धुलीको तीनपाटन गाउँपालिका घर भएका २५ वर्षीय युवराज आले मगर ।

प्रहरीका अनुसार युवराजले पेस्तोल देखाएर आफ्नो मोबाइल खोस्न खोजिएको तर प्रतिवादका क्रममा हतियार झरेको बयान दिएका छन् ।

प्रहरीले भने उनको बयानलाई पुष्टि गर्ने अन्य आधारको खोजी भइरहेको जानकारी दिएको छ ।

प्रहरीले हतियार युवराजकै भएको हुनसक्ने आशंकामा उनीसँग सोधपुछ गरिरहेको छ । अहिले उनी प्रहरीकै सम्पर्कमा रहेका जनाइएको छ ।


तस्वीर– प्रतिकात्मक


प्रतिक्रिया दिनुहोस्